बिर्तामोड, जेठ ६ । झापामा मंगलबार ९ जना कोभिड १९ संक्रमित थपिएका छन् । झापाको कचनकवल गाउँपालिकाका ९ जनामा संक्रमण पुष्टि भएको कोसी अस्पतालले जनाएको छ ।
कोसी अस्पतालको प्रयोगशालामा उनीहरुको परीक्षण भएको थियो । सुनसरीका दुईजनामा पनि आजै संक्रमण पुष्टि भएको छ । यो सँगै प्रदेशमा संक्रमितको संख्या ५४ पुगेको छ । त्यसमध्ये १७ जना उपचारपछि घर फर्केका छन् ।
सोमबार कचनकवलकै एकजनामा संक्रमण देखिएको थियो । उनकै सम्पर्कमा रहेका थप नौजनामा संक्रमण देखिएको हो । झापामा यसअघि दमक र बाह्रदशीका पुरुषमा कोरोना पुष्टि भएको थियो । उनीहरु निको भएर घर फर्किसकेका छन् ।
सुनसरीको इटहरीका एकजना युवक र एकजना प्रहरीमा संक्रमण पुष्टि भएको छ । धरानस्थित बिपी कोइराला प्रतिष्ठानमा भएको परीक्षणमा उनीहरुमा संक्रमण देखिएको हो ।
