बिर्तामोड, माघ १७ । बिर्तामोड नगरपालिका वडा नम्बर ५ मा तीन महिने खेल प्रतियोगिता हुने भएको छ ।
५ नम्बर वडा युवा तथा खेलकुद विकास समितिको आयोजनामा यही माघ २१ गतेबाट खेल प्रतियोगिता आयोजना हुने भएको हो । प्रतियोगिताअन्तर्गत माघ २१ गतेदेखि एक महिनासम्म आत्मरक्षाका लागि महिलाहरुलाई निःशुल्क कराते तालिम प्रदान गरिने अध्यक्ष विशाल धिमालले बताए ।
त्यस्तै, फागुन १ गते वडास्तरीय सुपर सिक्स क्रिकेट प्रतियोगिता हुनेछ भने फागुन पहिलो साता मैत्रीपूर्ण भलिबल खेलको आयोजना गरिएको धिमालले जानकारी दिए । फागुन दोस्रो साता वडास्तरीय बास्केटबल प्रतियोगिता हुनेछ ।
समितिले फागुन अन्तिम साता वडास्तरीय फुटसल प्रतियोगिता आयोजना गरेको छ भने चैत दोस्रो साता वडास्तरीय शारीरिक सुगठन प्रतियोगिता गरेर तीन महिने खेलकुदको समापन गरिने धिमालले बताए ।
