झापा, बैशाख ११ । कोभिड–१९ संक्रमणको दोस्रो लहर तीव्र बनेकै बेला झापाको एक सरकारीसहित चारवटा अस्पतालले अक्सिजन प्लान्टको धमाधम निर्माण गर्न थालेका छन् ।
मेची प्रादेशिक अस्पतालमा बैशाख महिनाभित्र सञ्चालनमा ल्याउने गरी प्रदेश नम्बर १ सरकारको ७५ लाख रुपैयाँको लगानीमा अक्सिजनको प्लान्ट निर्माणाधीन छ ।
कोभिड–१९ संक्रमितको उपचारका लािग ७५ शैय्याको अलग अस्पताल समेत सञ्चालन गरिरहेको मेची अस्पताल भद्रपुरमा रहेको छ ।
बिर्तामोडमा निजी क्षेत्रबाट सञ्चालित बिएन्डसी हस्पिटल र ओमसाई पाथिभरा हस्पिटलले आफ्नै अक्सिजन प्लान्ट निर्माण गरिरहेका छन् ।
मनमोहन सामुदायिक अस्पतालले विगत चार महिनादेखि नै अक्सिजन प्लान्ट सञ्चालनमा ल्याइसकेको जनाएको छ ।
झापामा पहिलो अक्सिजन प्लान्ट सञ्चालन गर्ने मनमोहन सामुदायिक अस्पतालका निर्देशक रोमणि भट्टराईले दैनिक १८ सिलिन्डर अक्सिजन उत्पादन भइरहेको बताए ।
चार महिनाअघि शुभारम्भ कम्पनीसँगको साझेदारीमा प्लान्ट निर्माण गरिएको र उत्पादन हुन थालेपछि अक्सिजन बाहिरबाट खरिद गर्नुपर्ने झन्झटबाट अस्पताल मुक्त भएको उनले बताए ।
उनका अनुसार अस्पतालले प्रति महिना १ लाख ९५ हजार रुपैयाँका दरले कम्पनीलाई रकम बुझाएपछि पाँच वर्षपछि मात्र प्लान्ट अस्पतालको स्वामित्वमा आउने सर्त रहेको छ ।
आवश्यक अक्सिजनका सिलिन्डर निजी सप्लायर्सबाट खरिद गर्दै आएका अस्पतालहरुले आफ्नै प्लान्ट भएपछि अस्पतालमा अक्सिजनको अभाव नहुने र आपूर्ति व्यवस्था भरपर्दो हुने विश्वास लिएका छन् ।
मेची अस्पतालका लेखा अधिकृत मनोज पोखरेलका अनुसार दैनिक ३५ वटा सिलिन्डर भर्न सक्ने क्षमताको प्लान्ट बनाउन लागिएको छ ।
ठुला र साना गरी ४७ वटा अक्सिजन सिलिन्डर हाल अस्पतालमा रहेको र दैनिक २० देखि २५ वटासम्म खपत हुँँदै आएको छ । कोभिडका बिरामी बढ्दै जाँदा अक्सिजनको माग अरु बढ्ने उनले बताए ।
देशकै सुविधासम्पन्न अस्पतालको रुपमा परिचित बिर्तामोडको बिएन्डसी हस्पिटलले पनि बैशाखभित्रै आफ्नै प्लान्टबाट अक्सिजन उत्पादन गर्ने जनाएको छ ।
आफ्नै परिसरमा पूर्वाञ्चल क्यान्सर अस्पताल समेत सञ्चालन गर्दै आएको बिएन्डसी हस्पिटलमा दैनिक ३५ देखि ४० वटा सिलिन्डर खपत भइरहेको हस्पिटलका जनसम्पर्क अधिकृत प्रमिस गिरीले बताए ।
‘सबै बिरामीलाई अक्सिजन चाहिँदैन’, हस्पिटलका जनसम्पर्क अधिकृत गिरीले भने, ‘आइसियु र जटिल समस्या भएका बिरामीलाई चाहिने हुँदा अहिले यतिले पुग्दैछ ।’
हस्पिटलले हरेक शैय्या र इमर्जेन्सी कक्षमा अक्सिजनको पाइपलाइन पुर्याएको छ । कोभिड–१९ को संक्रमण बढेसँगै अक्सिजन समेत थप चाहिने हुँदा दैनिक ५० सिलिन्डर अक्सिजन उत्पादन गर्ने तयारीका साथ प्लान्ट निर्माण अन्तिम चरणमा पुगेको उनको भनाइ छ ।
बिएन्डसी हस्पिटलले प्लान्ट निर्माणमा पाँच करोड रुपैयाँ लगानी भइसकेको जनाएको छ । हाल अस्पतालले सुनसरीको इटहरीस्थित निजी सप्लायर्सबाट अक्सिजन खरिद गर्दै आएको छ ।
भद्रपुरको ओमसाई पाथिभरा हस्पिटलले आगामी असार मसान्तभित्रै अक्सिजनको आफ्नै प्लान्ट सञ्चालनमा ल्याउने जनाएको छ ।
हस्पिटलका प्रबन्ध निर्देशक बालकुमार पोखरेलले हाल प्लान्टको पाइपलाइन जडान कार्य भइरहेको जनाउँदै ६० लाख रुपैयाँको लागतमा अक्सिजनको प्लान्ट जडान गरिने बताए । बिर्तामोडको जलकन्या सप्लायर्सबाट हाल अक्सिजनको सिलिन्डर खरिद गरिँदै आएको उनले जानकारी दिए ।
झापाको मेची प्रादेशिक अस्पताल बिर्तामोडको बिएन्डसी हस्पिटल र भद्रपुरको ओमसाई पाथिभरा हस्पिटलमा सरकारी स्वास्थ्य बीमा कार्यक्रम लागु भइसकेको छ ।
बिर्तामोडमा रहेको विर्ता सिटी अस्पतालले नयाँ भवन निर्माणाधीन रहेको हुँदा सोही भवनमा अक्सिजनको प्लान्ट राखिने जनाएको छ ।
(अम्बिका भण्डारी ÷रासस)
