![](https://jhapatoday.com/wp-content/uploads/2021/09/dilmaya-1024x687.jpg)
बिर्तामोड, असोज ११ । झापाको संघीय क्षेत्र नम्बर ४ मा वडास्तरीय फुटबल प्रतियोगिता हुने भएको छ । नेपाल खेलकुद महासंघको आयोजनामा दिलमाया स्मृति कप २०७८ हुन लागेको हो ।
आज झापाको सुरुङ्गामा पत्रकार सम्मेलन गरेर आयोजकले प्रतियोगिताबारे जानकारी गराएको हो । यो क्षेत्रमा रहेका २८ वडाले प्रतियोगितामा सहभागिता जनाउने छन् ।
यस क्षेत्रअन्तर्गत रहेका कनकाई नगरपालिकाका ७, झापा गाउँपालिकाका ७, शिवसताक्षी नगरपालिकाका ११, गौरादह नगरपालिकाको एक र गौरीगञ्ज गाउँपालिकाका २ वडाले उपाधिका लागि प्रतिस्पर्धा गर्ने संयोजक सुनिल भेटवालले जानकारी दिए ।
प्रतियोगिताअघि पूर्वछनोट गराइनेछ । सो क्षेत्रअन्तर्गत कनकाई नदी पूर्व १४ र पश्चिममा १४ वटा वडा रहेका छन् । जसअनुसार कनकाई र झापाबाट दुईदुई, शिवसताक्षीबाट तीन र गौरीगञ्ज र गौरादहबाट एक टिम छनोट चरण पार गरेर अन्तिम आठमा प्रवेश गर्ने खेल व्यवस्थापन संयोजक गजेन्द्र ताम्ली लिम्बूले बताए ।
स्थानीय वडाहरुले आफ्नो पालिकामा छनोट चरण खेल्ने छन् भने क्वार्टर फाइनलदेखिका सात खेल दुधे खेल मैदान हुने छन् । पालिकाको छनोट खेलहरु असोज १२ गतेबाट सुरु हुने छन् भने अन्तिम आठको खेल तथा उट्घाटन कार्यक्रम कात्तिक ८ गते र फाइनल खेल कात्तिक १६ गते हुने महासंघले जनाएको छ ।
भेटवालका अनुसार प्रतियोगिताका विजेताले नगद दुई लाख २५ हजार र उपविजेताले एक लाख २५ हजार तथा ट्रफी, मेडल र प्रमाणपत्र प्राप्त गर्नेछन् । त्यस्तै, अन्तिम आठबाट बाहिरिने चारवटा टिमले नगद १५ हजार र अन्तिम चारबाट बाहिरिने दुई टिमले नगद २५ हजार पाउने छन् ।
प्रतियोगिताको सर्वोत्कृष्ट एकजना खेलाडीलाई १० हजार रुपैयाँ प्रदान गरिनेछ भने प्रत्येक खेलको म्यान अफ द म्याचले दुई हजार ५०० रुपैयाँ पाउनेछ । व्यक्तिगत विधातर्फ उच्च गोलकर्ताले सात हजार ५०० तथा उत्कृष्ट रक्षक, उत्कृष्ट मिड फिल्ड र उत्कृष्ट गोलरक्षकले समान पाँचपाँच हजार रुपैयाँ पाउने भेटवालले जानकारी दिए ।
![](https://jhapatoday.com/wp-content/uploads/2021/09/dilmaya1.jpg)
प्रतियोगिता सम्पन्न गर्न १६ लाख ७० हजार ५०० रुपैयाँ खर्च लाग्ने अनुमान गरिएको छ । आयोजक नेपाल खेलकुद महासंघले २८ वटै टिमलाई आज ६०० थान जर्सीसमेत प्रदान गरेको थियो ।
प्रतियोगिता सम्पन्न गर्न दिलमायाको स्मृतिमा उनका पति बुद्धिमान साँवा तथा साँवा परिवारले सम्पूर्ण खर्च व्यवस्थापन गर्ने बताइएको छ । स्वर्गीय दिलमाया सो क्षेत्रका संघीय सांसद एलपी साँवा लिम्बूकी आमा हुन् ।
कार्यक्रममा सांसद साँवाले लामो समयको लक डाउनले ठप्प रहेको खेलकुद क्षेत्रलाई यो प्रतियोगिताले चलायमान बनाउने बताए । कार्यक्रममा महासंघका केन्द्रीय अध्यक्ष रमेश पौडेल, उपाध्यक्ष दिपेन्द्रप्रसाद दाहाल, झापा जिल्ला फुटबल संघका अध्यक्ष भगिरथ आले मामा, एमाले झापाका कार्यालय सचिव शिव ढुंगेललगायतले प्रतियोगिता सफलताको शुभकामना व्यक्त गरेका थिए ।