बिर्तामोड, मंसिर २४ । भोलि शनिबारबाट बंगलादेशमा सुरु हुने दोस्रो संस्करणको साफ यु–१९ महिला फुटबल च्याम्पियनसिपमा नेपालले बंगलादेशविरुद्ध खेल्दैछ ।
नेपालका लागि बंगलादेशविरुद्धको खेल बदला लिने एक मौकाको रुपमा रहनेछ । किनभने पहिलो संस्करणमा बंगलादेशविरुद्ध पराजित भएपछि नै नेपालले उपविजेतामा चित्त बुझाउनु परेको थियो ।
फाइनलमा नेपाललाई १–० ले पराजित गर्दै बंगालदेशले पहिलो संस्करणको उपाधि जितेको थियो । बंगलादेशले नेपाललाई समूह चरणमा पनि २–१ ले पराजित गरेको थियो ।
उपाधिसँगै यसपटक नेपालको लक्ष्य पनि बंगलादेश र भारतलाई पराजित गर्नु रहेको छ । बंगलादेश प्रस्थान गर्नुअघि नै नेपाली टिमका कप्तान अन्जना राना मगरले टिमको मुख्य लक्ष्य उपाधिसँगै भारत र बंगलादेशलाई हराउनु रहेको बताएकी थिइन् ।
मुख्य प्रशिक्षक हरिओम श्रेष्ठले यसपटक उपाधि जितेर आउने बताएका थिए । राउन्ड रोविनको आधारमा हुने प्रतियोगितामा पाँच टिमको सहभागिता रहेको छ ।
आयोजक बंगलादेशसहित नेपाल, भुटान, भारत र श्रीलंकाले सहभागिता जनाएका छन् । राउन्ड रोविनको खेलपछि शीर्ष दुई टोली फाइनलमा प्रवेश गर्नेछ ।
नेपालले दोस्रो खेल श्रीलंकाविरुद्ध डिसेम्बर १५ मा खेल्नेछ । नेपालको तेस्रो खेल भुटानविरुद्ध डिसेम्बर १७ र अन्तिम खेल भारतविरुद्ध डिसेम्बर १९ मा रहेको छ ।
शीर्ष दुई टोलीबीचको फाइनल खेल डिसेम्बर २१ मा हुनेछ । यसअघि सन् २०१८ मा भुटानमा भएको पहिलो संस्करण यु–१८ टिमबीच भएको थियो ।
