बिर्तामोड, जेठ २ । ट्वान्टी २० अन्तर्राष्ट्रिय शृंखलाको पहिलो खेलमा युगान्डा महिला टिमसँग नेपाली महिला टिम पराजित भएको छ ।
टियु क्रिकेट मैदानमा सोमबार नेपाल युगान्डासँग १२ रनले पराजित भएको हो ।
जितको लागि १०३ रनको विजयी लक्ष्य पछ्याएको नेपालले निर्धारित २० ओभरमा ९ विकेट गुमाउँदै ९० रन बनायो । नेपाललाई जितको लागि अन्तिम १२ बलमा २६ रन चाहिँएको थियो ।
१९ औँ ओभरको पहिलो बलमै क्रिजमा जमेर बसेकी उपकप्तान इन्दु रन आउट भएपछि नेपालको जितको सम्भावना सकिएको थियो ।
इन्दु २८ बलमा १ चौकासहित सर्वाधिक १६ रनमा आउट भइन् । नेपालका कुनै पनि ब्याटरले राम्रो प्रदर्शन गर्न सकेनन् । प्रमुख तीन ब्याटर रन आउट भएका थिए ।
पहिलो विकेटका लागि ओपनर ज्योति पाण्डे र विन्दु रावलले ४.२ ओभरमा २० रनको साझेदारी गरेका थिए । रावल २३ बलमा २ चौकासहित १२ रन र ज्योति ७ बलमा ६ रनमा आउट भए । दुबै ओपनर रन आउट हुन पुगेका थिए ।
कप्तान रुविना क्षेत्री बेलबासेलाई ११ औँ ओभरको चौथो बलमा सारा अकिटेङले ९ रनमा बोल्ड गरिन् । अर्को ओभरमा अप्सरी बेगम जेनेट म्बाबाजीले १ रनमा एलबीडब्ल्यु आउट गर्दा नेपाल ४४–४ को अवस्थामा पुगेको थियो ।
१३ औँ ओभरको दोस्रो बलमा अकिटेङले हिटर कविता जोशीलाई ४ रनमा क्याच गराएपछि नेपालको जित कठिन बनेको थियो । १७ औँ ओभरको पहिलो बलमा रोमा थापा ५ रनमा एलबीडब्ल्यु आउट भएपछि नेपाल ६१–६ को दयनीय अवस्थामा पुगेको थियो ।
तल्लोक्रममा डली भट्ट ९ बलमा २ चौकासहित १३ रनमा बोल्ड भइन् । युगान्डाकी सारा अकिटेङले ४ ओभरमा १३ रन खर्चेर २ विकेट लिइन् । कोन्सी अवेकोले ४ ओभरमा १५ रन खर्चेर २ विकेट लिइन् । रिता मुसामाली र जेनेत म्बाबाजीले १(१ विकेट लिए ।
त्यसअघि टियु क्रिकेट मैदानमा टस हारेर ब्याटिङको निम्तो पाएको युगान्डाले निर्धारित २० ओभरमा ५ विकेट गुमाउँदै १०२ रन बनाएको थियो ।
युगान्डाकी जेनेत म्बाबाजीले ३८ बलमा ३ चौकासहित सर्वाधिक २९ रन बनाइन् । नेपाललाई तीव्र गतिकी बलर कविता कुँवरले पहिलो ओभरमै सफलता दिलाएकी थिइन् ।
कविताको तेस्रो बलमा ओपनर लिओना बबेरीलाई शून्यमा बोल्ड आउट हुन पुगिन् । दोस्रो विकेटका लागि जेनेत म्बाबाजाई र केभिन एविनोले ४५ रनको साझेदारी गरेका थिए ।
१२ औँ ओभरको पहिलो बलमा इन्दु बर्माले जेनेतलाई २९ रनमा एलबीडब्लू आउट गरिन् । ३८ बल खेलेकी उनले ३ चौका प्रहार गरिन् ।
अर्को ओभरको पहिलो बलमा रुविनाले एविनोलाई १५ रनमा इन्दु बर्माबाट क्याच गराइन् । उनले ३० बल खेलेकी थिइन् ।
रिता मुसामाली १७ बलमा १३ रनमा अविजित रहिन् । रिता न्यांगन्डोले १३ बलमा १ चौका र १ छक्कासहित १८ रनमा आउट भइन् । फ्रैंकलिन नज्जुम्बाले १८ बलमा १२ रन बनाइन् ।
नेपालकी कविता कुँवरले ४ ओभरमा १५ रन खर्चेर २ विकेट लिइन् । रुविना क्षेत्रीले ४ ओभरमा ३० रन खर्चेर १ विकेट लिइन् । कविता जोशी र इन्दु बर्माले १–१ विकेट लिइन् । नेपालले दोस्रो महिला टि२० आई खेल मंगलबार खेल्नेछ ।
