बिर्तामोड, जेठ १६ । बिर्तामोड उद्योग वाणिज्य संघले दुईजना सञ्चारकर्मीलाई पुरस्कृत गरेको छ ।
संघको आज अतिथि सदनमा सम्पन्न पाँचौँ वार्षिक साधारणसभामा सञ्चारकर्मी केशव भट्टराई र विनोद पाण्डेलाई सम्मान तथा पुरस्कृत गरिएको हो ।
कञ्चनजंघा एफएममा आवद्ध भट्टराई नेपाल पत्रकार महासंघ झापाका उपाध्यक्ष हुन् भने आमसञ्चार डटकममा आवद्ध पाण्डे महासंघका सदस्य हुन् ।
यसैबीच, संघले साधारणसभामार्फत विभिन्न भावी योजनाहरु अघि सारेको छ । संघका अध्यक्ष प्रकाश शिवाकोटीले प्रस्तुत गरेको प्रतिवेदनअनुसार संघलाई आर्थिक रुपमा अझ दरिलो बनाउनका लागि संघको भुइँतला तथा पश्चिम र उत्तरको कम्पाउन्डवालको ठाउँमा सटरसहितको कोठा तयार गरी व्यापारिक प्रयोजनका लागि भाडामा लगाउनेछ ।
त्यस्तै, प्रत्येक सपिङमल, कम्प्लेक्स, मार्केट तथा अत्यधिक कारोबार हुने स्थानमा सुझाव पेटिका स्थापना गर्ने, बिर्तामोड नगरपालिका र उद्योग वाणिज्य संघको संयुक्त साझेदारी तथा समन्वयमा जनचेतनामुलक कार्यक्रम, उत्पादनमुलक कार्यक्रमहरु सञ्चालन गर्ने संघले योजना बनाएको छ ।
त्यस्तै, बिर्तामोड नगर क्षेत्रका विभिन्न स्थानमा रुखबिरुवा राप्ने तथा भद्रपुररोड सडकको बीच भागको रोड डिभाइडरमा पूmलबगैँचा स्थापना गर्ने प्रतिवेदनमा उल्लेख छ ।
स्थानीय सरकारको समन्वयमा बिर्तामोड नगर क्षेत्रका विभिन्न स्थानमा सडकबत्ती जडान गर्न र भएका ठाउँमा मर्मत गर्ने, राति पनि प्रस्ट देखिन सकिने सिसी क्यामेरा थप गर्नका लागि आवश्यक समन्वय गर्ने योजना साधारणसभाले अघि सारेको छ ।
त्यस्तै, बिर्तामोडमा अतिआवश्यक रहेको सार्वजनिक शौचालयको विषयमा अध्ययन गरी मुक्तिचोक क्षेत्रको आसपास, महेन्द्र राजमार्गको नजिक उचित जग्गाको खोजी गरी सार्वजनिक शौचालय स्थापना गर्न कार्यमा नगरपालिकासँग समन्वयकारी भूमिका निर्वाह गर्ने प्रतिवेदनमा उल्लेख छ ।
संघले अन्तर्राष्ट्रिय स्तरको व्यापारिक महोत्सव सञ्चालन गर्ने, बिर्तामोडमा अव्यवस्थित पार्किङ, सवारीचापलाई ध्यानमा राखी ट्राफिक प्रहरी, स्थानिय प्रशासनको सहकार्यमा उचित व्यवस्थापनमा पहल गर्ने जनाइएको छ ।
साधारणसभालाई संविधानसभा सदस्य मनकुमार गौतम, सुधीरकुमार शिवाकोटी, नेपाल उद्योग वाणिज्य महासंघका पूर्वअध्यक्ष चण्डीराज ढकाललगायतले शुभकामना दिएका थिए ।
कार्यक्रमको सञ्चालन महासचिव अर्जुन मैनालीले गरेका थिए भने स्वागत वरिष्ठ उपाध्यक्ष राजु न्यौपानेले गरेका थिए ।
