बिर्तामोड, असार २७ । रोटरी क्लब अफ बिर्तामोड र रोट्र्याक्ट क्लब अफ बिर्तामोडको पद हस्तान्तरण कार्यक्रम सम्पन्न भएको छ ।
आइतबार साँझ बिर्तामोडको साई पार्टी प्यालेसमा भएको एक कार्यक्रमबीच सन् २०२२-२३ को जुलाई १ तारिकदेखि कार्यभार सम्हाल्ने नयाँ समितिको पद हस्तान्तरण भएको हो ।
रोटरीको १३ औँ पदस्थापन हो भने रोट्र्याक्टको १० औँ पदस्थापन कार्यक्रम हो । कार्यक्रममा रोटरीका नयाँ अध्यक्ष ओमकृष्ण बिमली र रोट्र्याक्टका नयाँ अध्यक्ष वसन्त ढकालले सपथ लिँदै आगामी कार्यकालका लागि पदभार ग्रहण गरेका थिए ।
उनीहरुलाई निवर्तमान अध्यक्ष नविन गट्टानी र प्रभात मास्केले पद हस्तान्तरण गरेका हुन् । कार्यक्रममा रोटरीका निवर्तमान डिजी सन्तोष रिजाल र रोट्र्याक्टका मेम्बरसिप अध्यक्ष विवेक श्रेष्ठले सहजीकरण गरेका थिए ।
कार्यक्रममा क्लबका सदस्य उद्योगी तथा समाजसेवी केदार गिरीको खर्चमा निःशुल्क सब-इन्जिनियरिङ पढिरहेकी पूजा सोरेनलाई चेक प्रदान गरिएको थियो । गिरीले झापा बाह्रदशीकी सोरेनलाई त्यसपछिको अध्ययनका लागि सम्पूर्ण खर्च व्यहोर्ने बताएका छन् ।
डा. सन्ध्या राठी र रोट्र्याक्ट क्लब अफ विर्तामोडमा सचिव प्रज्ज्वल बिमलीले सञ्चालन गरेको कार्यक्रममा प्रमुख अतिथि रिजाल, सहायक डिजी राधिका गुरूङ, विवेक श्रेष्ठ लगायतले शुभकामना मन्तव्य राखेका थिए ।
