बिर्तामोड, साउन १२ । नेकपा एमालेका अध्यक्ष केपी शर्मा ओली खेलप्रेमी मात्र होइनन्, खेलाडी पनि हुन् । उनी आक्कलझुक्कल खेलमैदानमा झुल्किरहन्छन् ।
उनी कुनै समय नियमित जस्तो ब्याडमिन्टन खेल्थे । ब्याडमिन्टन खेल्न छोडेको १२ वर्षपछि बुधबार गृहजिल्ला झापा पुगेका ओली बिहीबार बिहानै फेरि ब्याडमिन्टन कोर्टमा सटललाई र्याकेटमा राखेर देखिए ।
बिर्तामोडको महानन्दचोकमा रहेको बिग ब्रदर्स कबर्ड हलमा पुगेका उनले करिब एक घण्टा खेले । एमाले स्थायी कमिटी सदस्य अग्नि खरेलको घरनजिकै रहेको सो हलमा खरेल नियमित ब्याडमिन्टन खेल्ने गर्छन् ।
उनले घरि सटललाई र्याकेटमा राखेर सर्भिस गरे । विपक्षी टोलीले हानेको प्रहारलाई रिसिभ गर्ने क्रममा कहिले ब्याक ह्यान्ड, कहिले फोरह्यान्ड र स्म्यासमै एक घन्टा खर्च गरे । देखिजान्नेहरुका अनुसार उनको ट्याकल खेलको नियमभित्रै थियो ।
यसअघि पनि खेल तथा खेलाडीलाई उच्च मनोबल दिलाउन आफूले पनि विगतमा विभिन्न खेल खेल्ने गरेको बताउँदै आएका ओलीले बिहीबार ब्याडमिन्टन खेलेरै देखाए।
खरेलका अनुसार झापा जाने कार्यक्रम तय भएपछि उनले शारीरिक व्यायाम गर्ने भए ब्याडमिन्टन खेल्न सकिने जानकारी गराएका थिए ।
ओलीले जेलमा बस्दा नै ब्याडमिन्टन सिकेका थिए । त्यसपछि पनि खेलिरहन्थे । तर, खुट्टा मर्किएपछि ओलीले ब्याडमिन्टन खेल्न छाडेको १०-१२ वर्ष नै भएको खरेलले सुनाए ।
बिहीबार झापामा ओली र भलिबलका पूर्व राष्ट्रिय खेलाडी प्रभा काङबाङको जोडी र खरेल र कुमार राईको जोडीले झन्डै एक घण्टा खेलेको थियो ।
पाको शरीरका बाबजुद उनले देखाएको उत्साह खेलप्रेमीका लागि प्रेरणादायी थियो । मानिसलाई स्वस्थ रहनका लागि खाना, व्यायाम र आराम महत्वपूर्ण रहेको ओलीको भनाइ थियो ।
