बिर्तामोड, कात्तिक २३ । न्युजिल्यान्डलाई हराउँदै पाकिस्तान टि–२० विश्वकप क्रिकेटको फाइनलमा पुगेको छ । आज बुधवार सिड्नीमा भएको खेलमा पाकिस्तानले न्युजिल्यान्डलाई सात विकेटले हरायो ।
न्युजिल्यान्डले दिएको १५३ रनको लक्ष्य पाकिस्तानले मात्र तीन विकेट गुमाएर १९ ओभर १ बलमा भेटायो । पाकिस्तानका लागि मोहम्मद रिजवानले ५७, बाबर आजमले ५३ र मोहम्मद ह्यारिसले ३० रन बनाए । न्युजिल्यान्डका ट्रेन्ट बोल्टले दुई विकेट लिए ।
यसअघि टस जितेर ब्याटिङ गरेको न्युजिल्यान्डले निर्धारित २० ओभरमा चार विकेट गुमाएर १५२ रन बनायो । उसका लागि ड्यारी मिचेलले ५३ र केन विलियमसनले ४६ रन बनाए । बलिङतर्फ पाकिस्तानका शहीन अफ्रिदीले दुई विकेट लिए ।
टि–२० र एकदिवसीय विश्व कपका सेमिफाइनल खेलमा न्युजिल्यान्डले अहिलेसम्म पाकिस्तानलाई हराउन सकेको छैन । यी दुई टिमबीच अहिलेसम्म चारवटा सेमिफाइनल खेलमा भेट भएकोमा चारैपटक पाकिस्तानले जितेको छ ।
यसैबीच, दोस्रो सेमिफाइनलमा भोलि बिहीबार भारत र इंग्ल्यान्डबीच खेल्दै छन् । फाइनल खेल आउँदो आइतबार पौने २ बजे सुरु हुनेछ ।
