बिर्तामोड, साउन २२ । इजाजत बिना तथा दर्ता नगरी औषधि बिक्री गर्ने तीनजनालाई झापाको दमकबाट प्रहरीले पक्राउ गरेको छ ।
पक्राउ पर्नेहरूमा दमक-७ निवासी २६ वर्षीय दिपेश खड्का, दमक-६ निवासी ३३ वर्षीय रोशनकुमार साह र इलाम जिल्ला साबिक दानाबारी गाविस ७ घर भई हाल दमक-८ निवासी २६ वर्षीय सञ्जीव सुवेदी रहेको जिल्ला प्रहरी कार्यालय झापाका प्रवक्ता खगेन्द्रप्रसाद रिजालले जानकारी दिए ।
दमक- ७ स्थित पशु हाटमा बिनाइजजात धेरै परिणाममा औषधिहरू बिक्री वितरण भइरहेको विशेष सूचनाको आधारमा इलाका प्रहरी कार्यालय दमकबाट खटिएको प्रहरी टोलीले उनीहरूलाई औषधि सहित पक्राउ गरेको थियो ।
प्रहरीले उनीहरूको साथबाट ट्रामाडोल हाइड्रोक्लोराइड नामक क्याप्सुल ८ हजार ५६० पिस र स्पासीपिन ट्याब्लेट ७ हजार पिस औषधि बरामद गरेको जनाइएको छ ।
प्रहरीले उनीहरूले प्रयोग गरेको प्र १-०१-०१२ प ८५३५ नम्बरको स्कुटर समेत नियन्त्रणमा लिई आवश्यक कारबाहीको आइतबार औषधि व्यवस्था विभाग कार्यालय विराटनगर पठाइएको डिएसपी रिजालले बताए ।
