बिर्तामोड, साउन २९ । जापानस्थित पहाडी ग्रामीण सहर तोनो नगरका प्रतिनिधिहरु झापाको अर्जुनधारा नगरपालिकासँग भगिनी सम्बन्ध बनाउन आएका छन् ।
जापानका लागि नेपालका राजदुत डा.दुर्गाबहादुर क्षेत्रीको नेतृत्वमा जापानको तोनो सिटीका मेयर काजुहिको तादाको प्रतिनिधि कानाको होसोकावासहितको टोली आज अर्जुनधारा आएको हो ।
टोलीले जापानिज प्रविधि तथा सीप नेपालमा कसरी भित्र्याउने र आर्थिक रुपमा कसरी सबल हुने भन्ने विषयमा नगरमा अन्तरक्रिया गरेको छ । टोलीले कृषि, निर्माण, उत्पादन, बजारीकरण, सीप तथा तालिमलगायतका विषयमा चासो राखेको छ ।
अर्जुनधारा नगरका प्रमुख बलदेवसिंह गोम्देन तामाङको अध्यक्षतामा भएको छलफल तथा अन्तरक्रिया कार्यक्रममा पूर्वराज्यमन्त्री धर्मशीला चापागाईं, संविधानसभा सदस्य प्रेम गिरी, अर्जुनधारा नगरका निवर्तमान नगरप्रमुख हरिकुमार रानालगायतले आआफ्नो धारणा राखेका थिए ।
नगरप्रमुख बलदेबले नगरलाई प्रविधिमैत्री बनाउँदै कोदोको रक्सीलाई ब्रान्डिङ र कृषकलाई आयआर्जनमा जोड्न जोड दिएका छन् । उनले किसानलाई प्रविधिमैत्री बनाएर आर्थिक रुपमा सबल बनाउनुपर्ने बताए ।
जापानबाट आएको टोलीले पशुपालन, कृषिअन्तर्गत नगदेबाली, धार्मिक तथा पर्यटकीय क्षेत्र अर्जुनधारा जलेश्वरधामलगायतका क्षेत्रको आजै स्थलगत भ्रमण तथा अनुगमन गरेको छ ।
