बिर्तामोड, भदौ ८ । इलाका प्रहरी कार्यालय झिलझिलेका इञ्चार्ज प्रहरी निरीक्षक (इन्स्पेक्टर) युवराज कटुवालमाथि साङ्घातिक आक्रमण गर्ने तीनजनालाई प्रहरीले पक्राउ गरेको छ ।
हिजो साँझ झापाको शिवसताक्षी नगरपालिका वडा नम्बर ९ स्थित याङयाचोकमा तीनजनाको संख्यामा रहेको युवाहरूको समूहले प्रहरी निरीक्षक कटवालमाथि सांघातिक आक्रमण गरेको थियो । आक्रमणबाट कटवालको टाउकोमा चोट लागेको छ ।
तीनजनाको संख्यामा मोटरसाइकलमा सवार उनीहरुलाई प्रहरी निरीक्षक कटवाल नेतृत्वको टोलीले राजमार्गमा रोकी सम्झाउने क्रममा उनीहरुले बञ्चरो प्रहार गरेका थिए । स्थानीयका अनुसार तीनैजना युवाले मदिरा सेवन गरेका थिए ।
तीनजना चढेका उनीहरुलाई रोकेर सोधपुछ गर्दैगर्दा ३६ वर्षीय अशोक पोखरेलले बोकेको बञ्चरो निकालेर कटुवाललाई टाउको र हातमा भकाभक प्रहार गरेका थिए ।
प्रहरीले मे.४ प २७५१ नम्बरको मोटरसाइकल र मोटरसाइकल चालक ३२ वर्षीय अरुण तामाङ, मोटरसाइकलको बीचमा बसेका ३३ वर्षीय लक्ष्मण टुडु र बञ्चरो हान्ने ३६ वर्षीय अशोक पोखरेललाई नियन्त्रणमा लिएर आवश्यक अनुसन्धान अघि बढाएको जनाएको छ । उनीहरूले प्रयोग गरेको मोटरसाइकलसमेत प्रहरी नियन्त्रणमा लिएको छ ।
झरना पुलनजिकै लागुऔषध प्रयोगकर्ताले ब्राउन सुगर प्रयोग गरिरहेको सूचना पाएपछि कटुवालको नेतृत्वमा सादा पोशाकको प्रहरी टोलीले मे ४ प.२७५१ नम्बरको मोटरसाइकललाई पिछा गरेको थियो । सो मोटरसाइकल लापरबाही ढङ्गले चलाएको पाएपछि सोधपुछ गर्ने क्रममा उनीमाथि बञ्चरो प्रहार भएको हो ।
बञ्चरो प्रहारबाट कटुवालको टाउकोमा गम्भीर चोट लागेको छ । उनको टाउकोमा आठ र हातको औँलामा तीन टाँका लगाइएको झापाका प्रहरी प्रवक्ता खगेन्द्र रिजालले बताए । उनको बिर्तामोडस्थित बिएन्डसी अस्पतालमा उपचार भइरहेको छ ।
