बिर्तामोड, असोज २ । किसानको उत्पादनलाई बजारसम्म पुर्याउन सहयोग गर्ने लक्ष्यका साथ झापा चारपानेको सहारा नेपाल साकोसले जुम्लाको स्याउको बिक्री सुरु गरेको छ ।
संस्थाका प्रमुख कार्यकारी महेन्द्रकुमार गिरीका अनुसार पहिलो चरणमा जुम्लाबाट छ हजार केजी स्याउ झापाको बिर्तामोड आइपुगेको छ । उनले झापाका सहकारीहरुलाई बिक्री प्रबर्द्धन गर्न आग्रह पनि गरेका छन् ।
सहारा नेपालको सहजीकरणमा जुम्लाको चन्दननाथ बहुउद्देश्यीय सहकारी संस्थाले उत्पादन गरेको जुम्ली स्याउ बिर्तामोडमा आइपुगेको गिरीले जानकारी दिए ।
जुम्लाबाट कालीकोट, दैलेख, सुर्खेत हुँदै नेपालगञ्ज भएर छ दिनमा स्याउ झापा ल्याइपुर्याएको चन्दननाथ सहकारीका वित्तीय प्रमुख रामकृष्ण धरलाले जानकारी दिए ।
सहाराले जुम्लाबाट झिकाएको स्याउको बजार मूल्य प्रतिकेजी २५० रुपैयाँ कायम गरेको लेखा विभागका महेश शाहले जानकारी दिए ।
जुम्लाका आठवटै स्थानीय तहमा स्थानीय जातको जुम्ली स्याउ, इटाली, गाला, गोल्डेन, फुजी र जोनाप्रिन्स जातका स्याउको खेती हुँदै आएको छ । झापा आएको स्याउ फुजी जातको हो ।
