बिर्तामोड, पुस १९ । महिनाको दुई लाख रुपैयाँ तलब पाउने गरी जापान पठाइदिन्छु भनेर साढे छ लाख रुपैयाँ ठग्ने झापाका एकजना पक्राउ परेका छन् ।
भक्तबहादुर राईसमेत दुईजनालाई वैदेशिक रोजगारीका लागि जापान पठाइदिन्छु भनेर ठगी गर्ने झापा घर भई अहिले काठमाडौँको टोखा बस्ने गणेशकुमार कुलुङ राईलाई काठमाडौँ उपत्यका अपराध अनुसन्धान कार्यालयले माछापोखरीबाट पक्राउ गरेको हो ।
उनले जापानमा महिनाको दुई लाख रुपैयाँ तलब हुन्छ भन्दै प्रतिव्यक्ति १५ लाख रुपैयाँ मागेका थिए । तर, पीडितहरूबाट पटकपटक गरी छ लाख पचास हजार रुपैयाँ रकम लिई सम्पर्कविहीन भएपछि प्रहरीमा उजुरी परेको थियो ।
विदेशमा आकर्षक तलब पाइन्छ भन्ने लोभमा गैरकानुनी तरिकाले कसैलाई पनि पैसा नदिन प्रहरीले आग्रह गरेको छ ।
Comments are closed