बिर्तामोड, पुस २५ । दक्षिणी सीमावर्ती झापाको कचनकवलमा फरक क्षमता भएका एक व्यक्तिले झुन्डिएर आत्महत्या गरेका छन् ।
कचनकवल ३ डाँगीबारी बजारका ३९ वर्षीय पानीलाल राजवंशीले गए राति बजारको टहरामा झुन्डिएर आत्महत्या गरेका हुन् ।
चियापसल गर्ने बुधु राजवंशीका जेठा छोरा पानीलाल राति २ बजे झुन्डिएको अवस्थामा भेटिएका थिए ।
बोली नभएका राजवंशीकी श्रीमती भाद्री राजवंशी पनि शारीरिक अपांग हुन् । टहराको मक्किएको बाँसमा डोरी लगाएर उनी झुन्डिँदा बाँस भाच्चिएको छ ।
राति परिवारले थाहा पाएर आफूलाई खबर गरेको कचनकवल गाउँपालिकाका उपाध्यक्ष नवराज भट्टराईले जानकारी दिए ।
राजवंशी केही दिनदेखि अस्वस्थ रहेका थिए । उपाध्यक्ष भट्टराईका अनुसार पेटको समस्या रहेका उनलाई आज परिवारले अस्पताल लान खोजेको थियो । मृतकका दुईजना छोरी रहेका छन् ।
