बिर्तामोड, माघ ८ । ‘धोकेबाज गायिका’ को उपमा पाएकी एलिना चौहानले निजी जीवनमा आफैँ धोका खाएकी छन् । प्रेमी विष्णु सापकोटासँग उनको ब्रेकअप भएको छ ।
अष्ट्रेलियामा बस्ने विष्णुसँग एलिनाको प्रेम ठिक एक वर्ष अगाडि सार्वजनिक भएको थियो । गत वर्षको तिजमा सांगीतिक प्रस्तुतिका लागि एलिना अष्ट्रेलिया जाँदा विष्णुलाई भेटेकी थिइन् ।
त्यसपछि उनीहरू प्रेममा परेका थिए । त्यसको ६ महिनापछाडि उनीहरूको अफेयर मिडियामा आयो । एलिनाले पनि यसको खुला स्वीकारोक्ति गरेकी थिइन् । एलिना र विष्णुले पटक–पटक फेसबुक लाइभमा सँगै आएर आफूहरूको प्रेम उजागर गरेका थिए ।
एलिनाले विष्णुसँग विवाहको योजनासमेत बुनिरहेकी थिइन् । यही वर्षको मंसिरमा विवाह हुन सक्ने उनी आफ्ना साथीहरूलाई बताउने गर्थिन् । तर, अहिले उनको प्रेम टुटेको निकट स्रोतले बतायो ।
विष्णुले केही समयदेखि एलिनालाई मानसिक तनाव दिइरहेको स्रोतको दाबी छ । आफ्नो चरित्रमाथि नै विभिन्न प्रश्न उठाउने, फोनमा भद्दा गालीगलौज गर्ने र परिवारका सदस्यका विषयमा समेत नचाहिँदा कुरा गर्न थालेपछि एलिना आजित बनेकी थिइन् ।
अन्ततः उनले अलग्गिने निर्णय लिइन् । भित्रैबाट टुटेकी एलिना अहिले सांगीतिक कार्यक्रमहरुमा आफूलाई व्यस्त राखिरहेकी छन् ।
स्रोतका अनुसार विष्णु एलिनाभन्दा अघि कला क्षेत्रकै विभिन्न युवतीहरुसँग अफेयरमा थिए । पछिल्लोपटक एक चर्चित म्युजिक भिडियो मोडलसँग उनको निकटता थियो । ती मोडलसँग ब्रेक अप नभइ उनी एलिनासँग नजिकिएका थिए ।
एलिनाले पनि विष्णुको प्रेममा डुबेपछि उनको ब्याक ग्राउण्डलाई महत्त्व दिइनन् । यद्यपि, विष्णुलाई नजिकबाट चिन्नेहरूले उनीहरूको प्रेम धेरै नटिक्ने आँकलन पहिल्यै गरेका थिए ।
चर्चाको लागि मात्रै विष्णुले एलिनालाई प्रयोग गरेको उनीहरूको अनुमान थियो ।
जादुमयी स्वरकी धनी एलिना अहिले सबैभन्दा डिमान्डेड गायिकामा पर्छिन् । ‘धोकेबाज हौ तिमी’ बोलको गीतले उनलाई चर्चाको शिखरमा पुर्याएको छ । यही गीतका कारण देश तथा विदेशका स्टेज शोहरुमा उनको चर्को माग छ ।
विष्णु भने लोकदोहोरी प्रतिष्ठानको अष्ट्रेलिया शाखाका अध्यक्ष हुन् । उनी गीत पनि गाउँछन् । प्रेममा परेपछि विष्णुले नेपाल आएर एलिनासँग एउटा युगल गीत रेकर्ड गराएका थिए तर खासै चलेन ।
-नेपालप्रेसबाट
