दमक, चैत ५ । झापाको गौरीगञ्जस्थित हुलाकी सडक खण्डमा मोटरसाइकल र साइकल एकापसमा ठोक्किँदा एकजनाको मृत्यु भएको छ ।
पश्चिमबाट पूर्वतर्फ आउँदै गरेको मे. ४ प ४२२४ नम्बरको मोटरसाइकलले विपरीत दिशाबाट आउँदै गरेको साइकललाई ठक्कर दिँदा घाइते भएका साइकलयात्रीको मृत्यु भएको हो ।
दुर्घटनामा साइकलयात्री गौरीगञ्ज-३ का अन्दाजी ४० वर्षीय अकालु माझीको मृत्यु भएको प्रहरीले जनाएको छ ।
गौरीगञ्ज-१ कमल बनियानी खोलापूर्व चौरी र कुञ्जीबारीको बीच खण्डमा हिजो राति सवा ९ बजे दुर्घटना भएको थियो ।
दुर्घटनामा गम्भीर घाइते भएका माझीको उपचारका लागि बिएन्डसी हस्पिटल बिर्तामोड पुर्याउनेबित्तिकै राति १० बजे चिकित्सकहरुले मृत घोषणा गरेका थिए ।
मोटरसाइकलमा सवार गौरीगञ्ज १ का अन्दाजी ३५ वर्षीय खोदनारायण महतोको बिएन्डसी हस्पिटलमा उपचार भइरहेको छ । उनको अवस्था गम्भीर रहेको प्रहरीले जनाएको छ ।
सोही मोटरसाइकलमा रहेका रतनलालसिंह राजवंशी र विकास महतोको निम्स हस्पिटल दमकमा उपचार भइरहेको छ । मोटरसाइकल कसले चलाएको थियो भन्नेबारे खुलिसकेको छैन ।
