बिर्तामोड, चैत १८ । खोटाङको बराहपोखरी गाउँपालिका–१ बराहपोखरीमा भएको ट्र्याक्टर दुर्घटनामा झापा बुद्धशान्ति गाउँपालिका–४ शान्तिनगरका २८ वर्षीय अमृत लिम्बूको मृत्यु भएको छ ।
बराहपोखरीको भीरगाउँस्थित रुम्दुबाट रसुवाघाटतर्फ खयरको काठ लिएर गइरहेको मे. १ त ८५९७ नम्बरको ट्र्याक्टर हिजो साँझ साढे पाँच बजे दुर्घटना हुँदा चालक लिम्बूको मृत्यु भएको हो । ट्र्याक्टर सडकभन्दा करिब सात सय मिटर तल खसेको प्रहरीले जनाएको छ ।
लिम्बूको शव सडकदेखि करिब पाँच सय मिटर तल भीरमा भेटिएको प्रहरीले जनाएको छ । ट्र्याक्टरमा सवार बराहपोखरीका २४ वर्षीय मुकेश मगर घाइते भएका छन् । उनको टाउको र शरीरका विभिन्न ठाउँमा चोट लागेको छ ।
