मेचीनगर, बैशाख १६ । झापाको बुद्धशान्तिमा जारी तेस्रो आदर्श च्यालेन्ज कपमा पाहुना टोली नर्थ बंगाल एफसी भारतलाई ३–१ गोल अन्तरले हराउँदै बिर्तामोड युनाइटेड एफसी सेमिफाइनलमा प्रवेश गरेको छ ।
बिर्तामोडको जितमा आशिष चापागाईंले ह्याट्रिक पूरा गरे । पहिलो हाफको इन्ज्युरी समयमा गोल गर्दै बिर्तामोडले अग्रता लिएको थियो ।
मध्यभागबाट बिर्तामोडका डिफेन्डर देवेन्द्र तामाङले गरेको फ्रिकिकलाई हेडमार्फत अभिषेक गुरुङले नर्थ बंगालको पोस्टमा प्रहार गरेका थिए ।
उनको प्रहार गोलरक्षक राकेश सिंहको हातबाट फुत्किएको मौकामा बिर्तामोडका आशिष चापागाईंले गोल गरेका हुन् ।
बिर्तामोडको अग्रता धेरैबेर टिकेन । दोस्रो हाफको दोस्रो मिनेटमा नर्थ बंगालले बराबरी गोल गरेको थियो ।
मोहम्मद राहुलको क्रस पासमा डिबक्समा अनमार्क रहेका हेमराज भुजेलले हेडमार्फत सुन्दर गोल गरेर खेललाई बराबरीमा ल्याए ।
दोस्रो हाफको ३८औँ मिनेटमा नर्थ बंगालका राहुल बासुमत्रीले बिर्तामोडकमा आशिष चापागाईंलाई डिबक्समा फाउल गरेपछि बिर्तामोडले पेनाल्टी पाएको थियो । आशिषले नै गोल गर्दै अग्रता दोब्बर बनाएका थिए ।
बिर्तामोडका लागि खेलको इन्ज्युरी समयमा आशिषले नै अर्काे गोल थपे । विपक्षी गोलरक्षक राकेश सिंह अगाडि बढेको समयमा गरेको उनको भली बल गोल भएको थियो ।
खेलको प्लेयर अफ द म्याच बिर्तामोडका ह्याट्रिककर्ता आशिष चापागाईं भए । उनले नगद तीन हजार पुरस्कार पाए ।
भोलि मानेभन्ज्याङ एफसी भारत र धरान फुटबल क्लब सुनसरीबीच खेल हुने आयोजक समितिका मिडिया संयोजक सुरज दंगालले जानकारी दिए ।
