मेचीनगर, जेठ २० । झापाको मेचीनगर–१२ कालिझोडास्थित पूर्वपश्चिम राजमार्गमा भएको सडक दुर्घटनामा एकजनाको मृत्यु भएको छ ।
हिजो साँझ ७ः३० बजेको समयमा बिर्तामोडबाट चारआलीतर्फ जाँदै गरेको प्रदेश १–०१–०१४ प ८७८२ नम्बरको मोटरसाइकल र विपरीत दिशाबाट आउँदै गरेको मे. ११ प २०२८ नम्बरको मोटरसाइकल आपसमा ठक्कर खाएको थियो ।
दुर्घटना हुँदा प्रदेश १–०१–०१४ प ८७८२ नम्बरको मोटरसाइकलका चालक भद्रपुर १० का अन्दाजी ५२ वर्षीय नेत्रप्रसाद परियार सडकमा लडेका थिए ।
त्यही बेला बिर्तामोडबाट चारआलीतर्फ आउँदै गरेको मे. १ ख ३२५१ नम्बरको बसले उनलाई ठक्कर दिएको थियो ।
गम्भीर घाइते भएका परियारलाई बिएन्डसी अस्पताल बिर्तामोड झापा पठाएकोमा अस्पताल पुग्नसाथ राति ८ बजे चिकित्सकले मृत घोषणा गरेका थिए ।
दुर्घटनामा मे. ११ प २०२८ नम्बरको मोटरसाइकल चालक हल्दिबारी–४ बस्ने अन्दाजी ३१ वर्षीय सन्तोष मेचेको टाउकोमा चोट लागेको छ ।
सोही मोटरसाइकलमा पछाडि बसेका सोही ठाउँ बस्ने अन्दाजी ३१ वर्षीय सुरज मेचेको दाहिने हात र खुट्टामा चोट लागेको छ ।
उनीहरुको सोही अस्पतालमा उपचार भइरहेको छ । दुवै मोटरसाइकल र बस प्रहरी चौकी चारआलीको नियन्त्रणमा र बस चालक तत्काल फरार रहेकाले खोजतलास भइरहेको जिल्ला ट्राफिक प्रहरी कार्यालय झापाले जनाएको छ ।
