मेचीनगर, जेठ २६ । झापाको मेचीनगरस्थित पूवपश्चिम राजमार्गमा दुईवटा कार आपसमा जुधेका छन् ।
मेचीनगर ७ इटाभट्टास्थित पेट्रोल पम्पनजिकै आज बिहान ११ बजेतिर दुईवटा कार आपसमा ठोक्किएका थिए । कार ठोक्किँदा भयानक आवाज आएको प्रत्यक्षदर्शीले सुनेका थिए ।
पूर्वबाट पश्चिमतर्फ गइरहेको डिएल ९ सिबिबी ९४०७ नम्बरको भारतीय कालो रंगको कार र विपरीत दिशातर्फ गइरहेको प्रदेश १–०१–००१ च ७५०१ नम्बरको सेतो रंगको कार राजमार्गमै ठोक्किएका थिए ।
दुर्घटनामा परेको भारतीय गाडीको अगाडिको दायाँ चक्का र त्यसमाथिको भाग पूरै क्षतिग्रस्त भएको छ ।
त्यस्तै, अर्को सेतो कार ठक्कर खाएपछि राजमार्गबाट फन्फनी घुमेर राजमार्गको उत्तरी किनारातिर खसेको बताइएको छ ।
इलाका प्रहरी कार्यालय काँकरभिट्टाको प्रहरी टोली घटनास्थलमा पुगेर राजमार्गको बीच भागमा रहेको भारतीय कारलाई डोजरले ठेलेर सडकको जाम खुलाएको छ ।
दुर्घटनाको क्षतिबारे थप विवरण आउन बाँकी छ । घाइतेको अवस्थाबारे प्रहरीले जानकारी गराउन बाँकी छ ।
