मेचीनगर, साउन ३० । झापाको मेचीनगर–१३ कालिझोडामा मोटरसाइकलले पैदलयात्रीलाई ठक्कर दिँदा एकजनाको मृत्यु भएको छ । दुर्घटनामा दुईजना गम्भीर घाइते भएका छन् ।
पूर्वपश्चिम राजमार्गअन्तर्गत कालिझोडामा बिर्तामोडबाट चारआलीतर्फ जाँदै गरेको मे।६ प ८३२० नम्बरको मोटर साइकलले पैदलयात्रीलाई ठक्कर दिएको थियो ।
दुर्घटनामा परेका पैदलयात्रीको नाम थर खुल्न नसकेका ३६ वर्षका पुरुष घाइते भएका थिए । उनको टाउकोमा गहिरो चोट लागेका उनको उपचारका क्रममा मृत्यु भएको हो ।
दुर्घटनामा परेका मोटरसाईकल चालक मेचीनगर–९ का मन्दिप मेचेको दुवै हात र खुट्टामा चोट लागेको जिल्ला ट्राफिक प्रहरी कार्यालयले जनाएको छ ।
त्यस्तै, सोही मोटरसाइकलमा पछाडि बसेका सागर मेचेको टाउकोमा चोट लागेको छ । उनको गम्भीर अवस्थामा उपचार भइरहेको छ ।
