बिर्तामोड, साउन ३२ । दोस्रो संस्करणको गायन रियालीटी सो ‘याक्थुङ स्टार’ को डिजिटल अडिसन भदौ १ गते (भोलि) देखि हुने भएको छ ।
आज आयोजक अमर कृति म्युजिक प्रालिले बिर्तामोडमा पत्रकार सम्मेलन गरेर प्रतियोगिताबारे जानकारी दिएको हो ।
याक्थुङ भाषा याक्थुङ लिपि याक्थुङहरुको सान, अस्तित्व र मौलिकता बचाउने याक्थुङ स्टारको अभियान भन्ने नाराका साथ प्रतियोगिता हुन लागेको प्रालिका ब्रोसिस माबोहाङ लिम्बूले जानकारी दिए ।
प्रतियोगितामा याक्थुङ भाषामा गीत गाएर पठाउनुपर्ने प्रावधान रहेको लिम्बूले बताए । संसारभरिका सहभागीले प्रतियोगितामा भाग लिन पाउने आयोजकले जनाएको छ ।
बिर्तामोडमा हुने फाइनल प्रतियोगिताको विजेताले नगद चार लाख, दोस्रो हुनेले दुई लाख ५० हजार र तेस्रो हुनेले एक लाख ५० रुपैयाँ पाउने छन् ।
प्रतियोगिताका लागि बिर्तामोड, इलाम, सिक्किम लगायतका स्थानमा भौतिक रुपमै अडिसन लिइने लिम्बूले पत्रकार सम्मेलनमा जानकारी दिए ।
