बिर्तामोड, भदौ १५ । झापाको बिर्तामोडस्थित मुख्यचोकमा बसको ठक्करबाट एक महिलाको मृत्यु भएको छ ।
आज साँझ ५ः१० बजे बिर्तामोड–५ स्थित हिकोलाअगाडिको राजमार्गमा बिर्तामोड बसपार्कबाट बिर्तामोड पश्चिम स्टेन्डतर्फ जाँदै गरेको प्र. १–०२–००२ ख ००३५ नम्बरको यात्रुबाहक बसले बाटो काट्दै गर्दै गरेको प्र. १–०१–०१३ प ५७०० नम्बरको मोटरसाइकललाई ठक्कर दिएको थियो ।
ठक्करबाट मोटरसाइकलमा पछाडि बसेकी इलाम माई-४ गैरीगाउँ बस्ने ३० वर्षीया तुलसा पाँचकोटी गम्भीर घाइते भएकी थिइन् । मोटरसाइकल चालक सोही ठाउँ बस्ने ३६ वर्षीय ठिरप्रसाद सुवेदीलाई केही पनि भएन ।
घाइते पाँचकोटीलाई उपचारको लागि बिएन्डसी अस्पताल बिर्तामोड पठाइएकोमा बाटोमा नै उनको मृत्यु भइसकेको प्रहरीले जनाएको छ ।
बस र बस चालक कनकाई-३ बस्ने २९ वर्षीय हिमाल विक र मोटरसाइकल चालक सुवेदी समेतलाई नियन्त्रणमा लिई अनुसन्धानको लागि इलाका प्रहरी कार्यालय अनारमनीमा राखिएको प्रहरीले जनाएको छ ।
