बिर्तामोड, भदौ १६ । नेपाल आयल निगमले यसअघि १६ दिन पहिले घटाएको पेट्रोलियम पदार्थको मूल्य फेरि घटाएको छ ।
निगमले इन्डियन आयल कर्पोरेसन (आइओसी) ले मूल्य घटाएर पठाएपछि शनिबार राति १२ः०१ बजेदेखि लागु हुनेगरी मूल्य घटाएको बताएको छ ।
जसअनुसार पेट्रोलको मूल्य प्रतिलिटर २ रुपैयाँ घटेको छ । त्यस्तै, डिजेलको मूल्य प्रतिलिटर एक रुपैयाँले घटेको छ भने मट्टितेलको मूल्य प्रतिलिटर समान एक रुपैयाँले नै घटेको छ ।
घटेको मूल्य अनुसार चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्ज क्षेत्रमा पेट्रोल प्रतिलिटर १६० रुपैयाँ ५० पैसा, डिजल र मट्टितेल १५२ रुपैयाँ ५० पैसा कायम भएको छ ।
खरिद मूल्य बढे पनि निगमले ग्यासको मूल्य यथावत राखेको छ । अहिले ग्यासको मूल्य प्रतिसिलिन्डर १९१० रुपैयाँ रहेको छ ।
कर्पोरेसनले पठाएको नयाँ मूल्य सूचीअनुसार प्रतिसिलिन्डर ३५ रुपैयाँ ११ पैसा बढाएर पठाए पनि निगमले हाललाई बिक्री मूल्य यथावत राखेको हो ।
