बिर्तामोड, असोज १३ । झापा कचनकवलकी १५ वर्षीया बालिका नेहारिका राजवंशी जमुना खोलाले बगाएको दुई दिनपछि मृत भेटिएकी छन् ।
कचनकवल गाउँपालिकाका उपाध्यक्ष नवराज भट्टराईका अनुसार बगाएको ठाउँदेखि करिब २ किलोमिटर दक्षिण धानबारीमा केहीबेरअघि उनको शव भेटिएको हो ।
चमरभिट्टा गाउँदेखि करिब पाँच सय मिटरपूर्व नेपाल भारत सीमा नजिक धानबारीमा उनको शव भेटिएको उनले बताए । खोजी गर्नेक्रममा यसअघि आज बिहान उनको साइकल भेटिएको थियो ।
कचनकवल गाउँपालिका–१ झकुवाटोली बस्ने पचुँ राजवंशीकी छोरी नेहारिकालाई शुक्रबार दिउँसो जमुना खोलाले बगाएको थियो ।
भारतमा रहेकी सानिमाको घरबाट फर्कने क्रममा चमरभिट्टा पुलछेउमा पुगेपछि उनलाई खोलाले बगाएको थियो ।
