दमक, असोज १५ । झापाको कमल गाउँपालिकाको भित्री सडकमा भएको मोटरसाइकल दुर्घटनामा एकजनाको मृत्यु भएको छ भने अर्का घाइते भएका छन् ।
मृत्यु हुनेमा दमक–७ श्रीपाली टोल बस्ने ३६ वर्षीय राजन लिम्बू रहेको प्रहरीले जनाएको छ । उनको उपचारका क्रममा साँझ ७ बजे लाइफलाइन अस्पताल दमक मृत्यु भएको हो ।
हिजो साँझ ५ः४५ बजे कमल-५ मंगलबारेस्थित भित्री सडकखण्डमा ग्वालडुब्बाबाट दमकतर्फ आउने क्रममा मे. ८ प ७१८६ नम्बरको मोटरसाइकल आफैँ अनियन्त्रित भई दुर्घटना भएको थियो ।
दुर्घटनामा मोटरसाइकल चालक गौरादह-७ बस्ने २६ वर्षीय पारस राजवंशी सामान्य घाइते भएका थिए भने मोटरसाइकलको पछाडि बसेका लिम्बू गम्भीर घाइते भएका थिए ।
मोटरसाइकल चालक राजवंशीको सोही अस्पतालमा उपचार भइरहेको र मोटरसाइकल इलाका प्रहरी कार्यालय दमकको नियन्त्रणमा रहेको जनाइएको छ ।
