बिर्तामोड, कात्तिक १२ । हल्दिबारीको जलथल फुटबल क्लब बिर्तामोडको खोपबाडीमा जारी न्यु स्टार जिल्लास्तरीय फुटबल प्रतियोगिताको उपाधिनजिक पुगेको छ ।
आज भएको अन्तिम सेमिफाइनल खेलमा धाइजन चारआली एफसीलाई २-० गोल अन्तरले हराउँदै जलथल सेमिफाइनल प्रवेश गरेको हो ।
जलथलका लागि पहिलो हाफको इन्ज्युरी समयमा नितेश राईले गोल गरे । त्यस्तै, खेलको ४४ औँ मिनेटमा मनिष योङहाङले अर्को एक गोल थपे ।
खेलको प्लेयर अफ द म्याच जलथलका खमिर गिल्सन कन्दङवा भए । उनले नगद २ हजार पाए ।
उनलाई आजका प्रमुख अतिथि बिर्तामोड नगर उपप्रमुख नगेन्द्रप्रसाद संग्रौला, क्लबका अध्यक्ष कृष्ण लिम्बू र सौजन्यकर्ता सइन्द्र राईले नगद र ट्रफी वितरण गरे ।
जलथलले जितसँगै कात्तिक १४ गते बिर्तामोड–७ स्थित स्थानीय सुन्दर निचाझोडा वनको सुन्दर डाँडा खेलमैदानमा हुने फाइनल खेलमा बिर्तामोडको रेड स्टार एफसीसँगको भेट पक्का गरेको छ ।
प्रतियोगिताको विजेताले नगद ५१ हजार र उपविजेताले नगद ३१ हजारसहित आकर्षक ट्रफी पाउनेछ । प्रत्येक खेलको प्लेयर अफ द म्याचले नगद २ हजार पाउने छन् ।
विधागततर्फ पाँचवटा विधामा जनही ३३ सय र बेस्ट प्लेयर बन्ने खेलाडीले ट्रफीसहित नगद ५ हजार पाउने आयोजक न्यु स्टार क्लबले जनाएको छ ।
