बिर्तामोड, पुस ५ । झापाको बुद्धशान्तिमा भएको मोटरसाइकल दुर्घटनामा इलाममा कार्यरत एकजना प्रहरी सहायक निरीक्षक (असई) गम्भीर घाइते भएका छन् ।
दुर्घटनामा प्रहरी सहायक निरीक्षक ४७ वर्षीय अनिलप्रसाद भण्डारी गम्भीर घाइते भएको जिल्ला प्रहरी कार्यालय झापाले जनाएको छ ।
हिजो राति अन्दाजी ८ बजे बुद्धशान्ति–३ कालीखोलास्थित मेची राजमार्गमा इलामबाट बुधबारेतर्फ आउँदै गरेको प्र १–०२ ०४५ प ५०७४ नम्बरको मोटरसाइकल आफैँ अनियन्त्रित हुँदा भण्डारी घाइते भएका हुन् ।
प्रहरी चौकी जौवारी इलाममा कार्यरत मोटरसाइकल चालक झापा गौरादह जुरोपानी बस्ने भण्डारीको टाउकोमा गम्भीर चोट लागेको छ । अचेत अवस्थाका भण्डारीलाई उपचारको लागि बिएन्डसी अस्पताल बिर्तामोडमा भर्ना गरिएको छ ।
उनको भेन्टिलेटरमा उपचार भइरहेको जिल्ला ट्राफिक प्रहरी कार्यालय झापाले जनाएको छ । मोटरसाइकल इलाका प्रहरी कार्यालय बुधबारेको नियन्त्रणमा रहेको छ ।
