दमक, पुस १५ । झापाको कमल गाउँपालिका वडा नम्बर-५ मा रहेको गाई फार्ममा आगलागी हुँदा साढे १६ लाख रुपैयाँबराबर क्षति भएको प्रहरीले जनाएको छ ।
आज दिउँसो १ः१० बजे कमल- ५ पाथिभरा टोल बस्ने विनोद खरेलले आफ्नो घरदेखि अन्दाजी ५० मिटरपूर्व सञ्चालन गरेको लक्ष्मी पशु तथा कृषि गाई फार्ममा करेन्ट सर्ट भई आगलागी भएको हो ।
आगलागीबाट खरेलको सिमेन्टको पिल्लर भएको, टिनको छानो र टिनको टाटीले बारेको गाई फार्म पूर्णरुपमा जलेर नष्ट भएको छ ।
त्यस्तै, पानी तान्ने मोटर, कुटी काट्ने मेसिन, ३५ मन मकै, ५० मन धान र पराल गरी अन्दाजी १६ लाख ५० हजार रुपैयाँबराबरको क्षति भएको प्रहरीले जनाएको छ ।
प्रहरी, दमक नगरपालिका, शिवसताक्षी नगरपालिका, गौरादह नगरपालिका र मोरङ उर्लाबारी नगरपालिकाको दमकल, प्रहरी र स्थानीयबासीको सहयोगमा लागो पूर्णरुपमा नियन्त्रणमा आएको थियो ।
