बिर्तामोड, पुस १६ । हुलाकी राजमार्गअन्तर्गत झापाको गौरीगन्ज गाउँपालिका र झापा गाउँपालिका जोड्ने कनकाईमाई नदीको पुल १३ वर्षदेखि अलपत्र छ ।
सरकारी बेवास्ता र निर्माण व्यवसायी कम्पनी पप्पु–महादेव–खिम्ती जेभीको चरम लापरबाहीले पाँचपटक म्याद थप्दा पनि काम सकिएको छैन । पुलको निर्माण निर्माण व्यवसायी महासंघका अध्यक्ष रवि सिंहको कम्पनी महादेव–खिम्ती र हरिनारायण चौधरीको पप्पु कन्स्ट्रक्सन जेभीले गरेका हुन् ।
समयमै सम्पन्न गर्नेभन्दा विकास आयोजनाको ठेक्का लिने र होल्ड गरेर राख्ने काममा पप्पु लागेपछि पुल निर्माण अधुरै छ । पुल अनुगमनमा मन्त्रीदेखि सांसदसम्मले पटकपटक अनुगमन गरेका छन् । यो प्रधानमन्त्रीको जिल्ला झापामा अलपत्र पुल हो । यही जिल्लाका सांसद देवेन्द्र दाहाल भौतिक पूर्वाधार तथा यातायातमन्त्री छन् ।
कनकाई पुल नबनेपछि स्थानीय भने जोखिपूर्ण रूपमा बर्खामा डुंगा र हिउँदमा बाँसको पुलमा यात्रा गरिरहेका छन् । मोटरसाइकलमा यात्रा गर्नेलाई ५० रुपैयाँ र साइकलमा यात्रा गर्नेलाई ३० रुपैयाँ लिने गरिएको छ ।
हुलाकी राजमार्ग आयोजना कार्यालय इटहरीका प्रमुख युवराज पोखरेलले एक वर्षदेखि कनकाई पुलको काम रोकिएको बताए । निर्माण व्यवसायीले भने म्याद थपको सुनिश्चितता, बजेटको सुनिश्चितता खोजेको उनले बताए ।
सात सय मिटर लामो पुल २०६८ जेठ ३१ गते पप्पु र महादेव–खिम्ती जेभीले २०७२ जेठ २९ गते सम्पन्न गर्नेगरी ठेक्का सम्झौता गरेका थिए । पाँचौँपटकको म्याद २०८० असारमै सकिएको थियो । त्यसपछि म्याद थपिएको छैन । ५६ प्रतिशत मात्र काम सकिएको हुलाकी सडक आयोजना कार्यालय इटहरीले जनाएको छ ।
