बिर्तामोड, फागुन १७ । झापाको भद्रपुर–४ लक्ष्मीनगरस्थित इस्ट पोइन्ट इङलिस स्कुलले रजत जयन्ती तथा २५ औँ अभिभावक दिवस विविध रचनात्मक प्रस्तुतिका साथ शनिबार मनाएको छ ।
विद्यालय परिसरमा आयोजित समारोहका बीच कीचकबध ऐतिहासिक धार्मिक तथा पर्यटकीय स्थल व्यवस्थापन समितिका पूर्वअध्यक्ष, समाजसेवी दिलबहादुर थेवेले स्कुलले रजत जयन्ती तथा २५ औँ अभिभावक दिवस उद्घाटन गरेका थिए ।
विद्यालयको शिक्षक अभिभावक संघकी सदस्य नानु ढुंगेलको अध्यक्षतामा आयोजित समारोहलाई विद्यार्थीहरुले नै सञ्चालन गरेका थिए ।
कक्षा १० का विद्यार्थीहरु गुञ्जना बन र नुमाफुङ लिम्बूले संयुक्त रुपमा सञ्चालन गरेको समारोहमा कक्षा ८ की विद्यार्थी एञ्जिला घिमिरेले स्वागत गरेकी थिइन् ।
नर्सरीदेखि कक्षा १० सम्मका विद्यार्थीले आफ्नो प्रतिभा प्रस्तुत गरेको समारोहमा विद्यालयका सञ्चालक राजेन्द्रकुमार घिमिरेले विद्यालयको शैक्षिक तथा अतिरिक्त क्रियाकलापसहितको गतिविधिका बारे अभिभावकहरुलाई जानकारी गराएका थिए ।
उनले इस्ट पोइन्टले सैद्धान्तिक शिक्षासँगै प्रयोगात्मक, सीपयुक्त र व्यावहारिक शिक्षामा जोड दिएको बताए । सञ्चालक घिमिरेले पछिल्लो समय धेरै विद्यार्थी मोबाइललगायका विभिन्न खाले कुलतमा पर्दै गएको, अटेरी बन्दै गएको उल्लेख गर्दै अभिभावकहरुले पनि त्यस विषयमा ध्यान दिन र आफ्ना छोराछोरीमा निगरानी बढाउनुपर्ने उल्लेख गरे ।
नृत्य, गीत, नाटक, वक्तृत्वकला, एनसिसी कवाजजस्ता अतिरिक्त क्रियाकलाप प्रस्तुत गरिएको सो समारोेहमा प्रमुख अतिथि थेवे, प्याब्सन भद्रपुरका अध्यक्ष भक्त कार्कीलगायतले विद्यालयले पछिल्लो समय दक्षिणी क्षेत्रका विद्यार्थीहरुलाई समेटिइरहेको र प्रगति पनि गर्दै गइरहेको उल्लेख गरे ।
अभिभावकहरुको उल्लेख्य सहभागिता रहेको सोही समारोहका बीच अघिल्लो शैक्षिक सत्रमा कक्षागत रुपमा प्रथम, द्वितीय र तृतीय हुने विद्यार्थीलाई मेडल तथा प्रमाणपत्र वितरण गरिएको थियो । खेलकुदमा उत्कृष्ट विद्यार्थीहरुलाई पनि मेडल तथा प्रमाणपत्र वितरण गरिएको प्रिन्सिपल विनय टोप्पोले जानकारी दिए ।
भौतिक तथा प्राविधिक रुपमा सुविधासम्पन्न सो विद्यालयमा हाल चार सयभन्दा बढी विद्यार्थी अध्ययनरत छन् ।
