बिर्तामोड, फागुन १८ । नेपालकै उत्कृष्ट १० मा रहेको झापा बिर्तामोडको कर्णाली बचत तथा ऋण सहकारी संस्थाले संस्थापक सञ्चालक अध्यक्ष कमलबहादुर बस्नेतलाई सम्मान गरेको छ ।
संस्थाको रजत महोत्सव विशेष कार्यक्रमको अवसरमा आज बिर्तामोडमा बस्नेतलाई नगद २५ हजारसहित सम्मान गरिएको हो । बस्नेत हाल सिम्रिक साकोसको कार्यकारी प्रमुख छन् ।
कार्यक्रमका प्रमुख अतिथि कोशी प्रदेशका खानेपानी, सिँचाइ तथा ऊर्जामन्त्री एकराज कार्की तथा संस्थाका अध्यक्ष टसबहादुर श्रेष्ठले बस्नेतलाई सम्मानपत्र प्रदान गरेका थिए ।
रजत महोत्सवकै अवसर पारेर नेपाल पत्रकार महासंघ झापाका अध्यक्ष एकराज गिरीलाई नगद १० हजारसहित सम्मान गरियो । त्यस्तै, प्रारम्भिक शेयर सदस्य, पूर्वसत्तचालक र पुराना कर्मचारीलाई सम्मान गरिएको छ ।
पुराना कर्मचारी र शेयर सदस्यहरुलाई उपचार खर्च तथा सडक कुकुरलाई उपचार गर्ने पस सोसाइटी नेपाललाई समेत सम्मान गरिएको छ ।
संस्थामा २० वर्षभन्दा बढी सेवा अवधि पूरा गरेका नौजना कर्मचारीलाई सम्मान गरिएको हो । डिल्लीराम बस्नेत, मनहरि निरौला, सन्तोषकुमार श्रेष्ठ, कृष्णलाल न्यौपाने, सुजता बस्नेत, गौरादेवी ओली, गंगादेवी राई, मञ्जु खत्री र नन्दादेवी बस्नेतलाई सम्मान गरिएको हो ।
त्यस्तै, राष्ट्रियस्तरको भेट्रान बुद्धिचाल विजेता संस्थाका सञ्चालक समिति सदस्य दिलकेशर थापालाई पनि सम्मान गरिएको छ । विभिन्न समयमा भएका फुटसल, हाजिरीजवाफ प्रतियोगितामा विजेता उपविजेतालाई पनि सम्मान गरियो ।
त्यस्तै, संस्थाको स्थापनाकाल २०५७ सालदेखि २०५८ सालभित्र सदस्यता लिई हालसम्म निरन्तर उत्कृष्ट कारोबार गर्ने २५ जना सम्मान गर्नुका साथै उत्कृष्ट सदस्य परिचयपत्र प्रदान गरिएको थियो ।
संस्थाका अध्यक्ष टसबहादुर श्रेष्ठले रजत महोत्सव कार्यक्रमको अध्यक्षता गर्दै कार्यक्रममाथि प्रकाश पारेका थिए भने संस्थाको कार्यप्रगतिको वृत्तचित्र प्रस्तुत गरेका थिए ।
कार्यक्रमको सञ्चालन संस्थाका सचिव भूपाल बस्नेतले गरेका थिए भने संस्थाका उपाध्यक्ष रामकुमार गौतमले स्वागत मन्तव्य तथा सदस्य दिलकेशर थापाले स्वागत गीत प्रस्तुत गरेका थिए ।
