भद्रपुर, फागुन २१ । यही फागुन अन्तिम साता हुने झापा जिल्लास्तरीय १५ औँ राष्ट्रपति रनिङ शिल्ड खेलकुद प्रतियोगिताको तयारी पूरा भएको छ ।
यही फागुन २३, २४ र २५ गते मेची रंगशालामा हुने प्रतियोगिताको तयारी पूरा भएको झापा जिल्ला खेलकुद विकास समितिको कार्यालयमा आज भएको पत्रकार सम्मेलनमा जानकारी दिइयो ।
आयोजक जिल्ला खेलकुद विकास समितिका अध्यक्ष भेषराज भण्डारी प्रशान्तका अनुसार प्रतियोगितामा विद्यालय शिक्षाको माध्यमिक तहमा अध्ययनरत १४ देखि १८ वर्षसम्मका खेलाडीहरुले प्रतिस्पर्धा गर्ने छन् ।
झापाका प्रत्येक पालिकाभित्रका विद्यालयहरुबाट प्रतिस्पर्धा गरी छनोट भएका ६ वटा विधा (एथलेटिक्स–छात्र/छात्रा, भलिबल–छात्र/छात्रा, कबड्डी–छात्र/छात्रा, कराते–छात्र/छात्रा, तेक्वान्दो छात्र/छात्रा र उसु–छात्र/छात्राहरु प्रतियोगितामा सहभागी हुने भण्डारीले जानकारी दिए ।
प्रत्येक टिममा ६ विधाका करिब १२५ जना खेलाडी तथा अफिसियलहरु सहभागी रहनेछन् । प्रतियोगितामा करिब २ हजार खेलाडी, अफिसियलहरुको जमघट रहनेछ ।
प्रतियोगितापछि १५ वटा पालिकाबाट सहभागी खोलाडीहरुबाट विजेता खेलाडीहरु छनोट भई झापा जिल्लाको टिम बन्नेछ । करिब १२५ जनाको झापा टिम कोशी प्रदेशस्तरीय प्रतियोगितामा सहभागी बन्ने समितिका प्रवक्ता जगन कार्कीले बताए ।
