बिर्तामोड, चैत ६ । बागमती प्रदेशको हेटौँडामा हुने राष्ट्रिय हक्की प्रतियोगितामा भाग लिने झापाका दुई पालिकाका खेलाडीलाई विदाइ गरिएको छ ।
झापाको भद्रपुर र बिर्तामोडमा एक कार्यक्रमका बीच झापा जिल्ला हक्की संघले खेलाडीहरुलाई जर्सी प्रदान गर्दै विदाइ गरेको संघका अध्यक्ष मनोज बुढाथोकीले जानकारी दिए ।
हेटौँडा उपमहानगरपालिकाको आयोजनामा चैत ७ गतेदेखि ९ गतेसम्म हुने हेटौँडा कप अन्तरपालिका राष्ट्रिय पुरुष हक्की प्रतियोगिता (फाइभ एस) मा सहभागी हुने झापाका दुई टिमको विदाइ गरिएको हो ।
विदाइ कार्यक्रममा भद्रपुर नगरपालिकाका नगरप्रमुख गणेश पोखरेल, नगर खेलकुद विकास समितिका अध्यक्ष, उपाध्यक्ष, सदस्य साथै वडा अध्यक्ष, वडा सदस्यलगातयले शुभकामना व्यक्त गरेका थिए ।
बिर्तामोड नगरपालिकाको खेलाडीहरुमा सन्तोष बेस्रा, बिसन मुर्मू, शौरभ विश्वकर्मा, लक्ष्मण समारिया, विवेक राजवंशी, अजय राजवंशी, चिरन प्रधान र अम्बरबहादुर गुरुङ रहेको संघका सचिव वेदप्रकाश अग्रवालले बताए ।
त्यस्तै, भद्रपुर नगरपालिकाबाट रोशन चौधरी, मनोज चौधरी, डिल्ली चौधरी, प्रदिप राजवंशी, आर्यन राजवंशी, रोहित राजवंशी, विष्णु राजवंशी र मणिकुमार विश्वकर्मा रहेका छन् ।
भद्रपुर टिमको अफिसियलमा दिपक खतिवडा र बिर्तामोडको अफिसियलमा दुर्योधन कार्की रहेका छन् ।
