बिर्तामोड, चैत ७ । सामाजिक सञ्जालमा मनपरी अश्लील गाली गर्दै आएका झापा हल्दिबारी– १ का २३ वर्षीय नितेश भनिने नवराज ओलीलाई प्रहरीले पक्राउ गरेको छ ।
जनप्रतिनिधि, राजनीतिक दलका नेतादेखि लिएर प्रहरी प्रशासन र पत्रकारहरुलाई समेत उनले फेसबुकमा जथभावी लेख्दै आएका थिए । उनलाई चैत ३ गते काठमाडौँको सोह्रखुट्टेबाट प्रहरीले पक्राउ गरी झापा ल्याएको हो ।
विदेशमा बसेर उनले झापाका जनप्रतिनिधि, विभिन्न राजनीतिक दलका नेतादेखि लिएर प्रहरी प्रशासन र पत्रकारहरुलाई समेत सामाजिक सञ्जालको दुरुपयोग गर्दै गालीगलौज गर्ने, चरित्र हत्या गर्ने, विभिन्न आरोप लगाउने गरेका थिए ।
नेपाल फर्केपछि उनलाई भेट्न हल्दिबारी १ स्थित घरमा गत फागुन ३ गते प्रहरी टोली पुगेको थियो । प्रहरीलाई समेत उनले जथाभावी अश्लील गालीगलौज गरेका थिए ।
सो उजुरीका आधारमा पक्राउ परेका ओलीलाई ५ दिनको म्याद थप गरेर अनुसन्धान गरिरहेको जिल्ला प्रहरी कार्यालयका सूचना अधिकारी डिएसपी खगेन्द्र खड्काले जानकारी दिए ।
उनलाई फौजदारी अपराध संहिता २०७४ अन्तर्गत अभद्र व्यवहार कसूरमा मुद्दा चलाइने डिएसपी खड्काले जानकारी दिए ।
