बिर्तामोड, चैत ७ । बिर्तामोडमा मुख्य कार्यालय रहेको एक सहकारी संस्थाको तीन करोड रुपैयाँभन्दा बढी रकम हिनामिना गर्ने सहकारीका कर्मचारी पक्राउ परेका छन् ।
तीन करोड ३५ लाख ४०० रुपैयाँ हिनामिना गरेको आरोपमा सहकारीका शिवगञ्ज सेवाकेन्द्रका प्रमुख जीवन भुजेल पक्राउ परेका हुन् ।
गौरादह-२ घर भई हाल सहकारीको शिवगञ्ज सेवाकेन्द्रको प्रमुख रहेका २८ वर्षीय भुजेलले सहकारीको सम्पत्ति, बचत तथा ऋण हिनामिना गरेको आरोप लागेको हो ।
सहकारीले उजुरी दिएपछि भुजेललाई चैत ३ गते पक्राउ गरिएको जिल्ला प्रहरी कार्यालय झापाका सूचना अधिकारी डिएसपी खगेन्द्र खड्काले बताए ।
उनलाई हिजो पाँच दिनको म्याद थप गरी अनुसन्धान भइरहेको डिएसपी खड्काले जानकारी दिए ।
