बिर्तामोड, चैत ९ । नेपाल उद्योग वाणिज्य महासंघ गण्डकी प्रदेश र नेपाल व्यापार कर्मचारी संघ (युनिकम) नेपालबीच ११ बुँदे सम्झौता पत्रमा हस्ताक्षर भएको छ ।
असल श्रम सम्बन्ध सुदृढ बनाउँदै श्रम कानुनको व्यावहारिक कार्यान्वयनका निमित्त पोखरामा भएको सम्झौतापत्रमा महासंघ गण्डकी प्रदेशका उपाध्यक्ष सूर्य भुजेल र युनिकम नेपालका अध्यक्ष गजेन्द्रबहादुर पौडेलले हस्ताक्षर गरे ।
सम्झौतापत्र हस्ताक्षर र आदानप्रदान कार्यक्रममा सहभागी वक्ताहरुले रोजगार प्रदायक र श्रमिकबीचको असल सम्बन्धले मात्रै समृद्धि हासिल गर्न सकिने धारणा राखेका थिए ।
उनीहरुले आपसमा विश्वासको वातावरण बनाउन यो सम्झौताले प्रधान भूमिका खेल्ने धारणा व्यक्त गरे । सम्झौतापत्र हस्ताक्षर समारोहमा सास्क फिनल्यान्ड प्रतिनिधि मारी तैभनिनले भर्चुअल सम्बोधन गरेकी थिइन् ।
त्यसअघि युनिकम नेपाल र उद्योग वाणिज्य संघका पदाधिकारीबीच सामाजिक संवाद गरिएको थियो । समझदारी पत्रको हस्ताक्षरअघिको सामाजिक संवादको औचित्य र महत्त्वमाथि प्रकाश पार्दै युनि–एप्रोको कार्यक्रम संयोजक तिलकजङ्ग खड्काले विषय प्रवेश गराएका थिए ।
एसिया प्यासिफिक क्षेत्रीय संयोजक फारिजन फजारीको समेत उपस्थिति रहेको सामाजिक संवादमा युनिकम नेपालका अध्यक्ष पौडेल सहित उपाध्यक्षहरु चिरञ्जीवी पौडेल र गोमा नेपाल, महासचिव लेखनाथ दाहाल, कोषाध्यक्ष दुर्गा भट्ट र सहसचिव रमण घिमिरेले सहभागिता जनाएका थिए ।
उद्योग वाणिज्य महासंघ गण्डकी प्रदेशका उपाध्यक्ष सूर्य भुजेल, कोषाध्यक्ष नवराज सुवेदी, सदस्यहरू झलक श्रेष्ठ, काशी गुरुङ , हरिकुमार श्रेष्ठ र सल्लाहकार दिनेश त्रिपाठी सहितले सामाजिक संवादमा भाग लिएका थिए ।
त्यसअघि दिउँसो युनिकम नेपालले संगठन सम्बद्ध सदस्यहरूलाई क्षमता अभिवृद्धि तालिम प्रदान गरेको छ । व्यापार क्षेत्रमा क्रियाशील सदस्यहरु सहभागी तालिमको सहजीकरण युनिकम नेपालका प्रतिमा भट्टले गरेकी थिइन् ।
४० जना सहभागी प्रशिक्षण कार्यक्रमको अध्यक्षता युनिकम नेपाल गण्डकी प्रदेशका अध्यक्ष राजु सुवेदीले गरेका थिए ।
