बिर्तामोड, चैत १० । अलैँची खेतीमा देखिएका समस्या समाधानका लागि नेपाल अलैँची व्यवसायी महासंघको टोलीले यतिबेला अलैँची उत्पादित पूर्वी पहाडी जिल्लामा निरन्तर कार्यक्रम गरिरहेको छ ।
यही क्रममा अलैँची उत्पादनदेखि बजारीकरणमा देखिएका समस्या समाधानको पहलका लागि सरकारवालाहरूसँग छलफल तथा अन्तरक्रिया कार्यक्रम महासंघले गरिरहेको हो । महासंघले शनिबार सोलुखुम्बु जिल्लामा कार्यक्रम गरेको छ ।
कोशी प्रदेश उद्योग कृषि तथा सहकारी मन्त्रालयको सहयोगमा सञ्चालित अन्तरक्रिया तथा छलफल कार्यक्रम कोशी प्रदेशका ९ वटा जिल्लामा सञ्चालन गरिने महासंघका अध्यक्ष निर्मल भट्टराईले जानकारी दिए । यही क्रममा सोलुखुम्बुको लिकुपिकेमा कार्यक्रम गरेको हो ।
महासंघका अध्यक्ष निर्मल भट्टराईको अध्यक्षतामा भएको छलफल तथा अन्तरक्रिया कार्यक्रमको प्रमुख अतिथि गाउँपालिका अध्यक्ष मिना कार्की बस्नेतले अलैँची खेतीमा फैलिएको रोग र अलैँचीमा जंगली जनावर बाँदरले आतंक मचाउँदा किसानले ठुलो क्षति व्यहोर्नु परेको बताइन् ।
विकट पालिकामा भएको कार्यक्रममा सहभागी किसानहरूले अलैँचीमा देखिएको रोग, सिँचाइ अभाव जलवायु परिवर्तनको प्रभाव, मूल्यको उतारचढाव र प्राविधिकको समस्या रहेको गुनासो गरेका छन् ।
कार्यक्रममा अलैँची विकास केन्द्रका प्राविधिक दिलबहादुर श्रेष्ठले कृषकहरूले राखेको जिज्ञासाको उत्तर दिएका थिए ।
व्यवसायी लेखराज बस्नेतले स्वागत गरेको कार्यक्रमको सञ्चालन महासचिव नारायणप्रसाद चिमरियाले गरेका थिए ।
महासंघले धनकुटा, भोजपुर, संखुवासभा, खोटाङ र सोलुखुम्बुमा कार्यक्रम गरेको हो । त्यसैगरी महासंघले सोलुखुम्बुमा पनि शाखा स्थापना गरेको छ । महासंघले एक कार्यक्रमका बीच १६ औँ शाखाको रुपमा सोलुखुम्बुमा शाखा विस्तार गरेको हो ।
रेखराज बस्नेतको अध्यक्षतामा १३ सदस्यीय नयाँ कार्यसमिति सर्वसम्मत चयन गरिएको महासंघका कार्यकारी अधिकृत अनिल ढुंगानाले जानकारी दिए ।
