बिर्तामोड, चैत १० । झापाको बिर्तामोडमा रहेको टाटा गाडीको आधिकारिक बिक्रेता अलस्का अटो मोबाइल्समा टाटाका नयाँ तीनवटा इभी कार सार्वजनिक गरिएको छ ।
टाटा मोटर्सको नेपालका लागि एक मात्र आधिकारिक वितरक सिप्रदी ट्रेडिङ प्रालिले बिर्तामोडस्थित अलस्का अटो मोबाइल्स प्रालिमा टाटाका नयाँ इभी कार सार्वजनिक गरेको हो ।
योसँगै अब अलस्का अटोमोबाइल्स बिर्तामोडबाट टाटाका हालै नेपालमा लञ्च भएका लोकप्रिय गाडीहरू कर्भ इभी, नेक्सन के ३ इभी र टियागो इभी २०२५ उपलब्ध हुनेछ अलस्काका प्रबन्ध निर्देशक प्रकाश शिवाकोटीले बताए ।
सिप्रदी ट्रेडिङ्गका प्यासेन्जर भेहिकल बिजनेस युनिटका प्रमुख सावन्तजंग सिँजापती र टाटा मोटर्सका कन्ट्री म्यानेजर प्रसन्न रंगनाथानको उपस्थितिमा अर्जुनधारा नगरपालिकाका प्रमुख बलदेवसिंह गोम्देनले टाटाका नयाँ इभी कार सार्वजनिक गरेका थिए ।
कार्यक्रमका प्रमुख अतिथि समेत रहेको नगरप्रमुख गोम्देनले टाटाले हालै बजारमा ल्याएका गाडीहरु समय सुहाउँदो र किफायती हुनेमा विश्वास समेत व्यक्त गरे । विद्युतीय सवारीको प्रयोगले इन्धन खरिदमा लाग्ने पैसाको समेत बचत हुने भन्दै इभीलाई प्राथमिकतामा राख्नु पर्ने धारणा राखे ।
कार्यक्रममा अलास्का अटोमोबाइल्सका प्रबन्ध निर्देशक प्रकाश शिवाकोटीले टाटा मोटर्सको आधुनिक र प्रिमियम गाडीहरू लञ्च गर्न पाउँदा खुसी व्यक्त गर्दै यी गाडीहरूले बजारमा ठुलो प्रभाव पार्ने विश्वास व्यक्त गरे । उनले अबका केही वर्षभित्र टाटाका गाडीहरु नेपाली बजारमा नम्बर एक भएर गुड्ने दाबी गरे ।
नेक्सन के ३ इभीले ठुलो ब्याट्री क्षमता र लामो दूरी तय गर्ने सुविधा दिने बताउँदै रंगनाथानले टियागो इभी २०२५ मोडेल नयाँ लुक्स, नयाँ सुविधाहरू तर पुरानै मूल्यमा आएको बताएका थिए ।
अब ग्राहकहरूले आफ्नो बजेट र आवश्यकताको आधारमा टाटाको गाडीहरू इच्छा अनुसारले रोज्न सक्ने उनको भनाइ थियो ।
उनले टाटा मोटर्सले ग्राहकहरूलाई स्टाइलिस र प्रिमियम गाडीहरू प्रदान गर्दै आएको बताएका थिए ।
सिप्रदी ट्रेडिङ्गले ग्राहकहरूलाई उत्कृष्ट सेवा प्रदान गर्न पूर्ण तत्परता देखाएको र हालै लञ्च गरिएका नयाँ इभीहरूले ग्राहकहरूको मन जित्नेमा आफू विश्वस्त रहेको बताए ।
कार्यक्रममा नयाँ गाडीहरूको चाबी ग्राहकहरूलाई हस्तान्तरण गरिएको थियो । नयाँ इभी कार लञ्च गर्नासाथ चारजनाले खरिद गरेकाले उनीहरुलाई गाडीको चाबी उपलब्ध गराइएको थियो ।
