बिर्तामोड, चैत ११ । झापाको बिर्तामोड-३ सैनिकमोडमा सञ्चालित अधिकांश होटलहरु बिनादर्ता तथा नवीकरण नै नगरी सञ्चालन गर्दै आएको पाइएको छ ।
अनुगमनका क्रममा १० वटा होटलमध्य ९ वटामा नवीकरण नभएको पाइएको बिर्तामोडका नगर उपप्रमुख नगेन्द्रप्रसाद संग्रौलाले जानकारी दिए । नवीकरण नभएकाहरुलाई तुरुन्त नवीकरण गर्न आग्रह गरिएको छ ।
अनुगमनका क्रममा म्याद गुज्रिएका पेय पदार्थ, लेवल नलगाइएका खाद्य उत्पादनसमेत भेटिएको थियो । सिटी होटल एन्ड गेस्ट हाउसमा भने किचन अत्यन्तै फोहोर पाइएको होटल व्यवसायी संघ झापाकी अध्यक्ष इन्दिरा श्रेष्ठले बताइन् ।
बिर्तामोडका अन्य होटलहरुमा पनि चाँडै अनुगमन गर्ने उपप्रमुख संग्रौलाले बताए । उनले आवश्यक मापदण्डको पालना र दर्ता, नवीकरण अनिवार्य गर्न सबैलाई आग्रह गरे ।
संग्रौलाको संयोजकत्वमा जिल्ला प्रशासन कार्यालय, खाद्य तथा गुण नियन्त्रण विभाग, होटल व्यवसायी संघ, बिर्तामोड उद्योग वाणिज्य संघ लगायतको टोलीले संयुक्त रुपमा अनुगमन गरेको हो ।
