बिर्तामोड, चैत ११ । अस्वस्थ भएपछि करिब तीन महिनादेखि बिएन्डसी अस्पतालमै रहेका बिर्तामोड नगरपालिकाका पूर्वनगरप्रमुख ध्रुवकुमार शिवाकोटीलाई अदालतमा पेश गरिएको छ ।
कारागार चलानको अदालती आदेशपछि पनि उनी उपचारका लागि अस्पतालमै रहँदै आएका थिए । बकपत्रका लागि उनलाई बिएन्डसी अस्पतालबाट आज झापा जिल्ला अदालत लगिएको हो ।
सक्कल मिसिल नभएका कारण आज बकपत्र हुन सकेन । सक्कल मिसिल उच्च अदालत इलाममा लगिएकाले आज बकपत्र हुन नसकेको हो । सक्कल मिसिल झिकाएर भोलिदेखि बकपत्र सुरु गरिने अदालतका श्रेस्तेदार किरणकुमार सिंहले जानकारी दिए ।
झापा जिल्ला अदालतले थुनामा राख्न दिएको आदेशविरुद्ध शिवाकोटीले उच्च अदालत इलाममा पुनरावेदन दिएका थिए । उच्च अदालतले चैत ७ गते सक्कली मिसिल पेश गर्न आदेश दिएपछि चैत ८ गते लगेर बुझाइएको थियो ।
गत पुस २२ गते झापा जिल्ला अदालतले शिवाकोटीलाई पुर्पक्षका लागि कारागार चलान गर्ने आदेश दिएको थियो । आदेशमा अस्वस्थ्य रहेका शिवाकोटीको उपचारको व्यवस्था मिलाउनसमेत भनिएको थियो । त्यही आदेशबमोजिम झापा कारागारले उनलाई बिएन्डसी अस्पतालमा रहेर उपचार गर्न दिएको हो ।
उनको स्वास्थ्यमा धेरै सुधार आएकाले केही दिनअघि झापा कारागारका प्रमुख रेवन्त भट्टराईले कारागार पठाउने बताएका थिए । तर, अझैसम्म उनलाई बिएन्डसी अस्पतालमै राखिएको छ ।
घरेलु कामदारको रुपमा राखिएकी १६ वर्षीया नाबालिकालाई जबरजस्ती करणी गरेको आरोपमा शिवाकोटी गत मंसिर २४ गते पक्राउ परेका थिए ।
