भद्रपुर, चैत ११ । तरकारीको झोलाभित्र लागूऔषध ब्राउन सुगर ल्याउने दुई युवक मेची पुलमा पक्राउ परेका छन् । पक्राउ पर्नेहरूमा इलाम माई नगरपालिका-५ का अन्दाजी ३३ वर्षीय भूपेन्द्र लावती र बिर्तामोड-५ का अन्दाजी २३ वर्षीय राजीव चौधरी रहेका छन् ।
सोमबार साँझ पौने ७ बजे मे. ६ प ९९७७ नम्बरको मोटरसाइकल सवार उनीहरू भारतबाट नेपालतर्फ आइरहेको अवस्थामा वडा प्रहरी कार्यालय भद्रपुर र लागुऔषध नियन्त्रण ब्युरो काँकरभिट्टाबाट खटिएको संयुक्त टोलीले भद्रपुर-५ स्थित मेची पुलमा रोकेर जाँच गरेका थिए ।
मोटरसाइकलको पछाडि चढेका चौधरीले बोकेको तरकारीको झोलाभित्र प्लास्टिकले लुकाइछिपाई ल्याएको ९ ग्राम १९ मिलिग्राम ब्राउन सुगर फेला परेको थियो । ब्राउन सुगरसहित पक्राउ परेका उनीहरूलाई आवश्यक कारबाही लागि जिल्ला प्रहरी कार्यालय झापा पठाउने जनाइएको छ ।
