भद्रपुर, चैत १३ । झापाको कचनकवल गाउँपालिका वडा नम्बर १ स्थित घेराबारी स्वाथ्य चौकीमा भएको दुई दिने निःशुल्क स्वास्थ्य शिविरमा २५३ जनाले स्वास्थ्य परीक्षण गराएका छन् ।
रोटरी क्लब अफ भद्रपुर र रोटरी क्लब अफ ललितपुर तथा नेपाल अपांग संघ खगेन्द्र नवजीवन केन्द्र झापा शाखाको संयुक्त आयोजनामा शिविर सञ्चालन भएको हो ।
नेपाल अर्थोपेडिक अस्पताल जोरपाटी काठमाडौँका वरिष्ठ विशेषज्ञ डक्टर कैलाश भण्डारी, डक्टर सज्जु प्रधान, डक्टर अनिल घिमिरे, डक्टर अनिस ज्ञवालीको टोलीले स्वाथ्य शिविरमा उपचार सेवा प्रदान गरेका थिए ।
रोटरी क्लब अफ भद्रपुरका अध्यक्ष सञ्जयराज पोखरेलको अध्यक्षता तथा कचनकवल गाउँपालिकाका अध्यक्ष कालेन्द्र राजवंशीको प्रमुख आतिथ्यमा सम्पन्न शिविरमा फार्मेसी विभागका विना अर्यालले निःशुल्क औषधि प्रदान गरेका थिए ।
नेपाल अपांग संघ खगेन्द्र नवजीवन केन्द्र झापामा रहेका अपांगता भएका बिरामीहरुको समेत जाँच गर्दै कार्यक्रम समापन गरिएको थियो ।
समापन कार्यक्रममा कचनकवल गाउँपालिकाका प्रमुख प्रशासकीय अधिकृत स्काइ पोखरेलले शिविर सञ्चालनमा सहयोग पुर्याउने महानुभावहरुलाइ प्रमाणपत्र वितरण गरेका थिए ।
कार्यक्रममा नेपाल अर्थोपेडिक अस्पताल जोरपाटीका प्रशासकीय अधिकृत श्याम रुपाखेती, रोटरी क्लब अफ ललितपुरका पूर्वअध्यक्ष रुपक दास ताम्राकारलगायत क्लबका सदस्यहरुको उपस्थिति रहेको थियो ।
कार्यक्रमको सहजीकरण क्लबका सचिव नरेश पराजुली, निवर्तमान अध्यक्ष विनोद चापागाई, कोषाध्यक्ष पवन श्रेष्ठ तथा प्रेसिडेन्ट इलेक्ट धनजुजु श्रेष्ठले गरेका थिए ।
