बिर्तामोड, चैत १३ । झापा बिर्तामोडको सञ्जीवनी अस्पतालअगाडि गत भदौमा भएको सडक दुर्घटनाका अर्का घाइतेको पनि मृत्यु भएको छ ।
दुईवटा मोटरसाइकल जुध्दा त्यतिबेला एकजना चालकको ज्यान गएकोमा अर्का घाइते चालकको पनि मृत्यु भएको प्रहरीले जनाएको छ ।
घाइतेको करिब ६ महिनापछि मृत्यु भएको हो । गत भदौ १३ गते राति १२ः४० बजे पूर्वपश्चिम राजमार्गमा पूर्वबाट पश्चिमतर्फ जाँदै गरेको मे. ५ प. ५५६८ नम्बरको मोटरसाइकल र विपरीत दिशाबाट आउँदै गरेको प्र १–०१–०१३ प ५१४० नम्बरको अर्को मोटरसाइकल एक आपसमा जुधेर दुर्घटना भएको थियो ।
दुर्घटनामा मे. ५ प ५५६८ नम्बरको मोटरसाइकलका चालक कनकाई–५ बस्ने २६ वर्षीय सागर घिमिरे गम्भीर घाइते भई उपचारको लागि बिएन्डसी अस्पताल बिर्तामोड पठाएकोमा डाक्टरले मृत घोषणा गरेका थिए ।
अर्का प्र. १–०१–०१३ प ५१४० नम्बरको मोटरसाइकलका चालक भद्रपुर–१० बस्ने २९ वर्षीय सरोज बस्नेत घाइते भएका थिए ।
टाउको र हात खुट्टामा चोट लागेर गम्भीर घाइते बस्नेतलाई विभिन्न अस्पतालमा उपचार गराउँदा स्वास्थ्यमा सुधार नआई अचेत अवस्थामा रहेकोमा हिजो बिहान उनको घरमै मृत्यु भएको हो ।
कानुनी प्रक्रिया पूरा गरी शव पोस्टमार्टमका लागि प्रादेशिक अस्पताल भद्रपुरमा पठाइएको जिल्ला प्रहरी कार्यालय झापाले जनाएको छ ।
