
बिर्तामोड, चैत १७ । प्रहरीले झापाको मेचीनगर र अर्जुनधाराबाट लागुऔषधसहित तीनजनालाई नियन्त्रणमा लिएको जनाएको छ ।
आज साँझ काँकरभिट्टाको मेचीडाँडाको मुनिबाट लागुऔषध नियन्त्रण ब्युरो काँकरभिट्टाको टोलीले कमल-४ बस्ने ३८ वर्षीय संयोग बस्नेत र दमक-८ बस्ने ३४ वर्षीय अंकित कार्कीलाई नियन्त्रणमा लिएको हो ।
कार्कीले घाँटीमा भिरेको कलेजी रंगको गलबन्दीभित्र प्वाल बनाएर प्लाष्टिकको पोकामा लागु औषध खैरो हेरोइन ९ ग्राम ७८० मिलिग्राम बरामद गरेको जिल्ला प्रहरी कार्यालय झापाले जनाएको छ ।
त्यस्तै, आज बिहान अर्जुनधारा-११ नयाँ बसपार्कबाट लागुऔषध ओसारपसार तथा बिक्री वितरण भइरहेको बेला अस्थायी प्रहरी पोस्ट नयाँ बसपार्कको प्रहरी टोलीले ताप्लेजुङ मेरिङदेन-२ का १९ वर्षीया वर्षा केदेम लिम्बूलाई पक्राउ गरेको छ ।
उनको साथबाट २ ग्राम १९० मिलिग्राम ब्राउन सुगर बरामद गरिएको र केदेम लिम्बूलाई नियन्त्रणमा लिई इलाका प्रहरी कार्यालयमा अनारमनीमा राखेर अनुसन्धान भइरहेको प्रहरीले जनाएको छ ।