बिर्तामोड, चैत १८ । झापाका विभिन्न पालिकामा बितेको १४ वर्षमा हात्तीको आक्रमणमा ६४ जनाले ज्यान गुमाएको डिभिजन वन कार्यालय झापाले जनाएको छ ।
पशु चिकित्सक सोनाम भालका अनुसार यो अवधिमा हात्तीको आक्रमणमा मृत्यु हुने विदेशी नागरिक आठजना रहेका छन् । २०६२ सालदेखि हालसम्म झापामा २२ वटा जङ्गली हात्तीको मृत्यु भएको डक्टर भालले बताए ।
डिभिजन वन कार्यालयको तथ्यांकअनुसार चालु आर्थिक वर्षमा जङ्गली हात्तीबाट पीडित ५१० जनालाई राहत वितरण गरिएको छ ।
जसमध्ये दुईजना घाइतेलाई दुई लाख ६१ हजार १२०, घर गोठ क्षति भएका १४८ घरपरिवारलाई २३ लाख, भण्डारण गरेको अन्न क्षति भएका १२७ परिवारलाई नौ लाख ७९ हजार ४५ र अन्नबाली क्षति भएका ३७१ परिवारलाई ३४ लाख ५३ हजार ४०० रुपैयाँ राहत वितरण गरिएको छ ।
कार्यालयका अनुसार चालु आर्थिक वर्षमा मन्त्रालयबाट चारजना मृतकको परिवारलाई जनही १० लाखका दरले ४० लाख र ३३ जना पीडितलाई ५२ लाख ९९ हजार ९२८ राहत वितरण गरिएको छ ।
डक्टर भालका अनुसार मृतकका परिवारलाई जनही १० लाख, घाइतेलाई अवस्था हेरी दुई लाखसम्म, जीवनभर अशक्त भएको अवस्थामा पाँच लाखसम्म, अन्नबाली तथा भण्डारणमा क्षति भएमा बढीमा १० हजारसम्म र घर गोठ भत्केको अवस्थामा अधिकतम २० हजारसम्म डिभिजन वनले राहत रकम उपलब्ध गराउँदै आएको छ ।
