बिर्तामोड, चैत २१ । झापामा माछा र तरकारी जोन कार्यक्रम पनि सञ्चालनमा आएको छ । प्रधानमन्त्री कृषि आधुनिकीकरण परियोजनाअन्तर्गत चार पालिकामा माछा जोन र तीन पालिकाका केही वडामा तरकारी जोन कार्यक्रम थपिएको हो ।
झापामा यसअघि धान, सुपारी, रबर, मकै जोक कार्यक्रम सञ्चालनमा छन् । चालु आर्थिक वर्ष २०८१–०८२ बाट शिवसताक्षी, गौरादह, कमल र गौरीगञ्ज पालिकाको सबै वडामा ‘माछा जोन कार्यक्रम’ सञ्चालन भएको हो ।
प्रधानमन्त्री कृषि आधुनिकीकरण परियोजनाका सूचना अधिकारी रविन निरौलाका अनुसार समान किसिमको बालीको उत्पादन हुने ५०० हेक्टर क्षेत्रफललाई समेटेर सरकारले जोन घोषणा गर्दै विभिन्न सहुलियत र सहयोग कार्यक्रम सञ्चालन गर्दै आएको छ ।
चार पालिकाका ४९ कृषि फार्म र चार कृषक समूहका ११६ महिलासहित २२० कृषक माछा जोन कार्यक्रममा सूचीकृत रहेको निरौलाले जानकारी दिए ।
माछा जोनतर्फ मत्स्य प्रवर्द्धन, माछाको उन्नत प्रविधि प्रवर्द्धन, एकीकृत माछापालन, ह्याचरी निर्माण, पोखरी निर्माण तथा सिँचाइ, पोखरी मर्मतलगायतका क्षेत्रमा परियोजनाले काम गरिरहेको छ ।
चालु आर्थिक वर्षमा सरकारले माछा जोनका लागि झापामा एक करोड ७८ लाख रुपैयाँ बजेट विनियोजन गरेको छ ।
त्यस्तै, मेचीनगर नगरपालिकाको वडा नम्बर १, २, ३, ८ र ९, बुद्धशान्ति गाउँपालिकाको वडा नम्बर ५, ६ र ७ र अर्जुनधारा नगरपालिकाको वडा नम्बर ८ र ९ को ५०० हेक्टरमा ‘तरकारी जोन कार्यक्रम’ लागु गरिएको छ ।
तरकारी जोन कार्यक्रमका लागि एक करोड चार लाख रुपैयाँ बजेट विनियोजन भएको छ । व्यावसायिक तरकारी खेती विस्तार, बेमौसमी तरकारीखेती, तरकारी प्रशोधन केन्द्र, साना मेसिनरी औजार उपकरण, कम्पोस्ट मल उत्पादन, थोपा सिँचाइलगायतमा कृषकलाई ५० प्रतिशत अनुदान प्रदान गरिँदै आएको निरौलाले बताए ।
