बिर्तामोड, चैत २१ । झापाको हल्दिबारी गाउँपालिकाले पालिकाबासीलाई निःशुल्क वितरण गर्दै आएको खानेपानीलाई निरन्तरता दिइरहेको छ ।
पालिकाबासीमा शुद्ध खानेपानीको पहुँच पु¥याउने उद्देश्यले निःशुल्क खानेपानी वितरण कार्यलाई दुई वर्षदेखि निरन्तरता दिइरहेको प्रमुख प्रशासकीय अधिकृत मानबहादुर बनले जानकारी दिए ।
गाउँँपालिकाले १० युनिट (१० हजार लिटर) सम्म पानीको महशुल स्थानीयलाई निःशुल्क दिँदै आएको योजना शाखा प्रमुख राजन न्यौपानेले बताए ।
यसअघि उपभोक्ताले मासिक १० युनिटसम्म खानेपानी खपत गर्दा १२० रुपैयाँ तिर्दै आएका थिए । सोभन्दा बढी खपत भएमा खपतका आधारमा उपभोक्ताले महशुल तिर्नुपर्नेछ ।
गाउँपालिका क्षेत्रभित्र हाल गोलधाप खानेपानी, जलथल खानेपानी र हल्दिबारी खानेपानी आयोजना सञ्चालनमा रहेका छन् ।
यी तीनवटा आयोजनाबाट ३ हजार ५९ जना उपभोक्ता लाभान्वित बनेको प्रमुख प्रशासकिय अधिकृत बनको भनाइ छ ।
गत आर्थिक वर्ष २०७९÷०८० मा पालिकामा करिब ३३ किलोमिटर क्षेत्रमा खानेपानी पाइप विस्तार गरिएको थियो ।
खानेपानी विस्तारका लागि चालु आर्थिक वर्षमा संघीय सरकारको सर्सत अनुदानमा प्राप्त १ करोड ५० लाखमध्ये १ करोड ८ लाख रुपैयाँमा पालिकाले ठेक्का लगाएको छ ।
जसबाट खानेपानीका पाइपसँगै आवश्यक सामग्री पालिकामा आइसकेको प्रशासकीय अधिकृत बनको भनाइ छ ।
निःशुल्क खानेपानी वितरणका लागि खानेपानी आयोजनाका कर्मचारीहरुको तलब र विद्युत् महशुल गाउँपालिकाले उपलब्ध गराउने गरेको न्यौपानेले जानकारी दिए ।
पालिकाले वार्षिक ४० लाख हाराहारीमा खानेपानी आयोजनालाई रकम उपलब्ध गराउने गरेको छ । अबको केही दिनमा पाइप लाइन विस्तार गर्न सुरु गरिने पालिकाले जनाएको छ ।
कर्मचारीको तलब र विद्युत् महशुल तिरिदिएबापत ती खानेपानी आयोजनाले उपभोक्तालाई मासिक १० युनिटसम्म खानेपानी निःशुल्क उपलब्ध गराउँदै आएका छन् ।
